Perezida w’Urukiko rw’Ikirenga yasabye ubuyobozi gukomeza gukumira ingengabitekerezo ya Jenoside
Mu karere ka Karongi mu Murenge wa Bwishyura, tariki ya 18 Mata 2025 habereye igikorwa cyo kwibuka abazize Jenoside yakorewe abatutsi mu 1994 biciwe kuri Home st Jean, Kiriziya st Pierre Kibuye,Stade Gatwaro n’ishuri rya EAFO Nyamishaba, hanashyingurwa imibiri 117 yabonetse hirya no hino mu mirege itanu y’aka Karere.
Umuyobozi w’akarere ka Karongi Muzungu Gerald yavuze ko hari n’indi mibiri yabonetse.Yagize ati “Habonetse imibiri isaga 300 harimo n’iyi 117 dushyinguye uyu munsi, indi ikazashyingurwa mu zindi nzibutso.
Yakomeje asaba urubyiruko kwigira ku mateka ya Jenoside ati “ Mwirinde icyatuma jenoside yongera kubaho, mwigire kuri aya mateka ya Jenoside yadutwaye abarenga miliyoni, muharanire kubaho muharanira ibyiza.”
Meya MUZUNGU Gerald yihanganishije abarokotse Jenoside yakorewe Abatutsi, asaba abagifite ingingimira kuri iyo Jenoside, gusura urwibutso rwa Gatwaro n’izindi ziri hirya no hino bakirebera amateka yayo; uko yateguwe n’uko yashyizwe mu bikorwa mu bugome ndengakamere.
Muhayimana Aloys Bosco wavuze mu izina ry’abafite imibiri yashyinguwe yagize ati “Ku ruhande rumwe turanezerewe ko tugiye gushyingura abacu babonetse,ariko ndagirango mbabwire ko muri iyi mibiri 117, iyashoboye kumenyekana ni 18 gusa indi ntitwashoboye kuyimenya, tumaze igihe dusaba abatarahigwaga kutwereka aho abacu bari ariko barinangiye.Ariko nibakomeza kwanga kuvuga imisozi izavuga kandi yarabitangiye.”
Yungamo ati “Iyi mibiri yose ntanumwe wigeze aranga aho iri ahubwo yabonetse aho bari gukora ibikorwa remezo nk’imihanda n’ibindi. Nk’uwanjye dushyinguye uyu munsi yabonetse aho bari guhinga icyayi nimudufashe rwose muturuhure ariko nimubyanga imisozi izabidukorera.”
Perezida wa Ibuka mu Karere, Ngarambe Vedaste ahereye ku mibiri 117 yashyinguwe none n’indi izashyingurwa ku buryo yose hamwe izaba isaga 300 muri uyu mwaka, yibukije ko abazi ahari itarashyingurwa,baherekana bakareka kurushwa ubugwaneza n’ibiza bituma hari imibiri iboneka.
Mukantaganzwa Domitilla wari umushyitsi mukuru yagize ati “Abo twibuka uyu munsi barimo abarenga ibihumbi 15000 bagiye imburagihe,ariko ntibaheze burundu kuko hari amashami yashibutse.Turagaya abayobozi bakoze jenoside n’abaturage bayitabiriye.
Madamu Mukantaganzwa yasabye ubuyobozi bw’inzego z’ibanze gukomeza gukumira no kurwanya ingengabitekerezo ya Jenoside ikigaragara muri bamwe mu baturage no gukomeza kubasaba bakerekana ahari imibiri y’abazize Jenoside yakorewe Abatutsi kugirango ishyingurwe mu cyubahiro.
Ati “Nubwo amateka yacu ashaririye ariko turashima abahagaritse jenoside tukaba tubona umwanya nk’uyu wo kwibuka. Icyo nasaba inzego zibanze ni ukwegera abantu bakagira ubutwari bwo kuvuga ahari imibiri itarashyingurwa igashyingurwa mu cyubahiro.
Ndangije nshimira inkotanyi zahagaritse jenoside zirangajwe imbere na Perezida was Repubulika Nyakubahwa Paul Kagame.”
Igikorwa cyo kwibuka ku nshuro ya 31 Jenoside yakorewe Abatutsi, cyabereye ku rwibutso rwa Gatwaro cyasojwe no gushyingura mu cyubahiro imibiri 117 yabonetse mu Mirenge 5 y’aka Karere, ndetse no gushyira indabyo ku mva ziruhukiyemo imibiri muri uru rwibutso.
Gashonga Jean Claude
