Perezida Kagame yaganiriye na Kabila kuri telefoni amubwira ko atakinisha kuva mu gihugu
Perezida w’u Rwanda Paul Kagame unayoboye Afurika yunze ubumwe (AU) yahamagaye kuri telefoni mugenzi we wa Congo, Bwana Joseph Kabila amubaza icyamubereye inzitizi mu kwitabira inama ya SADEC yari yatumiwemo, amusubiza ko atava mu gihugu kubera ibibazo kirimo.
Abakuru b’ibihugu na guverinoma bigize SADEC bagombaga kwitabira iyi nama yiga ku cyahosha ibibazo byakurikiye amatora ya perezida muri Congo bateranye uyu munsi. Congo nk’igihugu cyagombaga kwigwaho muri iyi nama iri kubera Addis Ababa, Ethiopia, perezida wacyo (Kabila wa Congo) ntiyayitabiriye nk’uko Chimprereports dukesha iyi nkuru yabitangaje.
Atangiza inama Perezida Paul Kagame yagize ati ” Mu gushyira ibintu ku murongo, nanahamagaye perezida wa Congo Joseph Kabila na we wahawe ubutumire.”
Kagame avuga ko Kabila yamubwiye ko ataboneka.
“Yambwiye (Kabila) ko yifuzaga kwitabira iyi nama ariko ko bitashobotse(atabasha kugenda) bitewe n’uko ibintu bihagaze.
Perezida Kagane yavuze ko Congo yizeye ko ibihugu bituranye nayo n’ibindi bigize uyu mugabane biyifata mu mugongo mu gushakira igisubizo iki kibazo.
Ntibikwiye kandi ko hari ibihugu byitwaza iki kibazo mu kugaragaza inyungu zabyo.
Biteganyijwe ko tariki ya 22 Mutarama hazarahira uwo uru rukiko ruzemeza ko yatsinze aya matora.
Ntakirutimana Deus
