Pax Press iri gufasha abanyamakuru gukurikirana urubanza rwa Rukeratabaro uburanira muri Suwede
Pax Press irakurikira urubanza rwa Théodore Rukeratabaro, ukurikiranyweho ibyaha bya Jenoside yakorewe abatutsi mu 1994. Araburanira muri Suwede( Sweden )mu bujurire. Ku rwego rwa mbere yahamijwe ibyaha by’ubwicanyi n’icyaha cya Jenoside, ubufatanyacyaha mu bwicanyi no gushimuta abatutsi. Yakatiwe gufungwa burundu arajurira.
Mu murenge wa Mururu, aho bikekwa ko yakoreye ibi byaha, abacitse ku icumu rya Jenoside yakorewe abatutsi mu1994, babwiye abanyamakuru bakorana na Pax Press bari gukurikirana uru rubanza, ko ari iby’ingenzi kumenya amakuru y’abahanirwa icyo cyaha baburanira mu mahanga.
Ibi ngo bifasha abacitse ku icumu kumva ko bahawe ubutabera, gutanga isomo ku bandi, ndetse akenshi byagaragaye ko na bamwe mu bo mu miryango yabo baba batazi amakuru ya bene izo manza barayamenya.
Uru rubanza mu rwego rw’ubujurire, rwatangiye kuburanishwa mu kwezi kwa Cyenda 2018, rukazasozwa mu kwezi kwa gatatu 2019.
Rukeratabaro Théodore, yavukiye mu cyahoze ari Segiteri Winteko, Komini Cyimbogo, Perefegitura ya Cyangugu mu 1969. Mu1994 yari umujandarume, yahungiye muri #weden mu 1998 abona ubwenegihugu bwaho mu 2006.
Abanyamakuru bakorana na Pax Press ku matariki ya 27 na 28 bageze aho bikekwa ko Rukeratabaro yakoreye ibyaha.
Pax Press irakurikirana uru rubamza nyuma yo gukurikirana urwa Octavien Ngenzi na Tito Barahira baherutse kuburanira mu Bufaransa aho bakatiwe igifungo cya Burundu mu bujurire.
Mbere yaho aba banyamakuru babanje guhura n’abahagarariye imiryango ifatanya na Pax Press mu gukurikirana izi manza barimo RCN Justice et Memoire baganira ku bijyanye n’uru rubanza b’uko rwakurikiranwa mu buryo bukwiye.
Ubusanzwe Pax Press ifatanya na Haguruka, RCN, Ami n’iyindi mu gukurikirana izi manza.
Ntakirutimana Deus
