Ngoma: Abakekwaho kwica umuturage bakanamubaga barasabirwa igihano gikomeye

Uwitwa Rukundo Juliette na Nzabagerageza Jean d’Amour bita Toto na Twagirayezu Julien bita Mafene baregwa kuba tariki ya 4 Werurwe 2018 mu gihe cya saa kumi n’imwe za nimugoroba  barishe Sibomana Jean de Dieu babanje kumunigisha umugozi biborohera kumuteragura ibyuma mu mutima kugeza apfuye.

Mu rwego rwo gusibanganya ibimenyetso bafata umurambo bawushyira mu mufuka barawikorera bawutwara ku Rutare bawutwikisha lisansi (essence), babonye udakongotse, bawucamo ibice bitatu amaguru yombi bayahamba ukwayo igihimba n’ibindi bisigaye babijugunya mu musarani.

Ku wa 26 werurwe 2019, Urukiko Rwisumbuye rwa Ngoma rwaburanishije urubanza ruregwamo abakekwa ku cyaha cy’ubwicanyi ku bushake.

Buri wese Ubushinjacyaha bukaba bwamusabiye igihano cy’igifungo cya burundu.

Uru rubanza  rwaburanishirijwe imbere y’imbaga y’abaturage aho icyaha cyabereye mu mudugudu wa Rama, mu kagali ka Nyankurazo, mu murenge wa Kigarama, mu karere ka Kirehe, Intara y’i Burasirazuba.

Uru rubanza razasomerwa aho rwaburanishirijwe tariki ya 5 Mata 2019.

Ntakirutimana Deus