Misiri: Hatowe ko itegeko nshinga rihinduka, Sisi ashobora kugeza mu 2030
Abanyamisiri batoye ku bwiganze bw’amajwi bemera ko itegeko nshinga rihinduka, ibi bikaba byemereye Perezida Abdul Fattah al-Sisi kuba ashobora kuguma ku butegetsi kugeza mu mwaka wa 2030.
Ikigo gishinzwe amatora mu Misiri cyatangaje ko 88.8 ku ijana (88.8%) by’abitabiriye amatora bemeje izo mpinduka. Abitabiriye ayo matora bari ku kigero cya 44.3 ku ijana (44.3 %) nkuko BBC yabitangaje.
Manda ya kabiri ya Bwana Sisi – yari isanzwe iteganyijwe kurangira mu mwaka wa 2022 – yavanywe ku myaka ine irongerwa iba itandatu, ubu akaba yemerewe kwiyamamariza gutegeka iyindi manda.
Abategetsi bavuze ko abaturage barenga miliyoni 23 n’ibihumbi 400 batoye basaba ko itegeko nshinga rihindurwa
Ku rubuga nkoranyambaga rwa Facebook, Bwana Sisi yashimiye abaturage b’iki gihugu batoye bemeza izo mpinduka, “bagatangaza amahanga” bagaragaza ko bazi ibibazo igihugu cyabo gihanganye nabyo.
Impinduka mu itegekonshinga abaturage batoreye muri iyi kamarampaka ziha kandi Bwana Sisi ububasha bwisumbuyeho ku rwego rw’ubucamanza, zikanarushaho gushimangira uruhare rw’igisirikare muri politiki.
Ikigo gishinzwe amatora mu Misiri cyatangaje ko nta kirego cyakiriye cyinubira imigendekere y’amatora
Mu mwaka wa 2013, Jenerali Sisi yayoboye abasirikare bavanyeho ubutegetsi bwa Perezida Mohamed Morsi – wa mbere muri iki gihugu wari watowe binyuze muri demokarasi – nyuma y’imyigaragambyo y’abamagana ubutegetsi bwe.
Kuva ubwo yakurikiranye cyane abarwanya ubutegetsi bwe bituma abantu ibihumbi birenga icumi bafungwa nk’uko bivugwa n’imiryango iharanira uburenganzira bwa muntu.
Mu karere k’ibiyaga bigari, amatora nk’aya ya kamarampaka agamije guhindura itegekonshinga aheruka kuba mu Burundi, u Rwanda na Uganda.
Ntakirutimana Deus
