Amerika: Joe Biden akomeje kwanikira Trump ku mahirwe yo gutorwa
Mu gihe hasigaye ibyumweru icyenda ngo amatora y’umukuru w’igihugu abe muri Leta zunze ubumwe z’Amerika, Joe Biden, umukandida w’Abademocrate akomeje guha intera Perezida Donald Trump, umukandida w’Abarepubulikani nkuko bigaragara mu bipimo bibanziriza amatora.
Abakora ibyo bipimo baravuga ko intera hagati yabo igenda iba ngufi, cyane muri za Leta zigira ijambo mu itora kurusha izindi.
Biden wabaye umusenateri w’Amerika imyaka 36 akunguriza Perezida Barack Obama imyaka umunani, yagumye kurusha Donald Trump hagati y’umunani n’icumi ku ijana muri ibyo bipimo kuva uyu mwaka wa 2020 utangira. Ariko muri iki gihe iyo ntera imaze kugabanuka kugera kuri 6.2 ku ijana nkuko byerekanwa n’urubuga rwa RealClearPolitics.
Joe Biden, umukandida w’Abademocrate na Donald Trump, umukandida w’Abarepubulikani
Iyo ntera kandi iragenda irushaho kuba nto cyane muri za Leta nka Pennsylvania, Michigan na Wisconsin aho ubusanzwe Abademocrate bakunze kwegukana intsinzi. Mu mwaka wa 2016, Perezida Trump yegukanye intsinzi bimugoye muri izo Leta ahita aba perezida.
Joe Biden aramutse ashoboye kuzigaruria zose, ntihagire igihinduka muri Leta 47 zisigaye, yahita aba perezida. Kugeza ubu ibipimo bibanziriza amatora biragaragaza ko ari ku isonga muri izo Leta uko ari eshatu, ariko Trump agenda amusatira.
Inkuru ya VOA
