Demokarasi mu karere: Ishyaka rya Nkurunziza ryagennye uziyamamariza kuyobora u Burundi
Ishyaka CNDD-FDD ryatanze Perezida Nkurunziza Pierre ku mwanya wo kuyobora u Burundi ryagennye umukandida mushya uzahatana kuri uyu mwanya.
Kongere y’iri shyaka yemeje Jenerali (waretse iri peti atorerwa kuyobora iri shyaka) Évariste Ndayishimiye(Alias NEVA) wari usanzwe uyobora iri shyaka. Uyu mugabo yavutse mu 1968 mu ntara ya Gitega. Uyu mugabo avuga ko azateza imbere iterambere ry’ubuhinzi.
Kuva muri Kanama 2016 yabaye umunyamabanga mukuru w’iri shyaka ryigamije kurinda demokarasi (Conseil national pour la défense de la démocratie-Forces de défense de la démocratie-CNDD-FDD).
Uyu mugabo ni umwe mu bavuga rikijyana mu Burundi, yayoboye ku myanya itandukanye mu Burundi, harimo n’uwa minisitiri w’umutekano ku bwa Nkurunziza, ndetse agaragara no mu bayobora imikino mu Burundi. Azwi cyane mu Burundi kubera inshingano yagiye ahabwa kuva mu 1993 nyuma y’iyicwa rya Merchiol Ndadaye.
Nkurunziza wari uyoboye u Burundi muri manda 3 zateje ikibazo mu 2015 ubwo habaga ibikorwa byo kumuhirika bikaza kuburizwamo, yavuzr ko atazongera kwiyamamariza kuyobora iki gihugu ibyo bamwe batiyumvishaga.
Intambwe yatewe uyu munsi iraganisha igihugu ku ihererekanya butegetsi mu mahoro. Mu karere byari bimenyerewe kuri Tanzania yabigize umuco, muri iyi minsi ariko na Congo yateye iyi ntambwe aho Joseph Kabila yahererekanyije ubutegetsi mu mahoro na Tshisekedi Felix. U Burundi nabwo bushobora kuba bugiye gutera iyi ntambwe.
Ntakirutimana Deus
