Nyamagabe: Ashobora gufungwa imyaka itatu azira kurandura ikimera gikomye
Ubushinjacyaha bwakiriye dosiye y’umugabo w’imyaka 40 y’amavuko, ukurikiranyweho icyaha cyo kurandura ikimera gikomye.
Ibiri muri iyo dosiye yakiriwe kuwa 13 Ukuboza 2021, byabaye tariki ya 08/12/2021 mu gihe cya saa mbiri n’igice z’igitondo mu ishyamba rya Pariki ya Nyungwe, ubwo abakozi b’iyo Pariki ya Nyungwe bari mu kazi kabo bagafata uyu mugabo afite imitego 16, ikibiriti, umupanga , umufuka n’igiti kimwe.
Uregwa mu ibazwa rye ahakana icyaha acyekwaho akavuga ko yarimo yahira ubwatsi bw’amatungo ariko akemera ko yahiraga ubwatsi mu materasi ya Leta.
Iki cyaha uyu mugabo akurikiranyweho kikaba gihanwa n’ingingo ya 59 y’itegeko No 48/2018 ryo ku wa 13/08/2018 rigenga ibidukikije.
Iyi ngingo ivuga ko iyo icyaha kimuhamye ahanishwa igifungo kitari munsi y”imyaka 3 ariko kitarenze imyaka 5 n’ihazabu y’amafaranga y’u Rwanda atari munsi ya miliyoni imwe ariko atarenze miliyoni eshatu .
NPPA
