Mourinho azinjira muri AS Roma abakinnyi bamwe basohoka azana abashya
Igenwa rya Jose Mourinho ngo abe umutoza wa Roma mu irushanwa ry’umwaka utaha w’imikino rishobora gutuma umukinyi wo hagati w’umutaliyani Lorenzo Pellegrini w’imyaka 24 yimukira muri Liverpool, ni mu gihe Mourinho ashaka kugura abakinnyi asanzwe azi cyane, harimo Nemanja Matic, umunya Serbia w’imyaka 32 usanzwe ukinira Manchester United nkuko biri mu nkuru ya The Mirror.
Mourinho yizeye ko, mu gihe azaba atangiye ibikorwa muri Roma, ashobora gukorana n’umuzamu wa Manchester United, umunya Espagne David De Gea w’imyaka 30 nkuko ikinyamakuru Todofichajes cyabitangaje.
Jose Mourinho ni umwe mu batoza bakomeye banibitseho ibigwi isi ifite kuri ubu, kuko yibitseho ibikombe 25 yatwaye ari mu makipe atandukanye, Mourinho yatoje amakipe atandukanye y’i burayi arimo FC Porto, Inter Milan, Chelsea, Real Madrid na Manchester United aherukamo.
Mourinho yatwaye ibikombe bya shampiyona imbere mu bihugu 4 bitandukanye mu makipe yatoje (Portugal, England, Italy ndetse na Spain).
Mourinho ni umwe mu batoza 3 batwaye igikombe cya Champions League inshuro ebyiri mu makipe atandukanye kuko yabikoze muri FC Porto 2004 ndetse no muri Inter Millan 2010, akaba yaranatwaye ibikombe bitatu bya shampiyona ari muri Chelsea mu mwaka 2005, 2006 na 2015.
Jose Mourinho yagarutse muri shampiyona y’abongereza nyuma yo kwirukanwa muri Manchester United, agiye muri Roma yirukanwe muri Totehnam.
