Ethiopia: Ibihano bikomeye k’ufatwa atambaye agapfukamunwa
Muri Ethiopia abafashwe batambaye agapfukamunwa bashobora guhanishwa igifungo cy’imyaka ibiri.
Iyo ngingo igamije kugabanya ikwirakwira ry’icyorezo cya COVID-19 nk’uko byatangajwe n’ibiro by’umushinkacyaha mukuru w’igihugu.
Yafashwe kubera impungenge ko abaturage bari kudohoka ku byerekeye kwambara agapfukamunwa nyuma y’aho amategeko yo mu bihe bidasanzwe akuriweho nkuko VOA dukesha iyi nkuru yabitangaje.
Iyo ngingo ivuga ko umuntu wese uzarenga ku mabwiriza ya leta ajyanye no kwirinda ikwirakwira rya Covid-19, azatanga ihazabu akanafungwa mu gihe cy’imyaka ibiri.
Minisitiri ushinzwe ubuzima muri iki gihugu, Lia Tadesse, kuri uyu wa kana yatangaje abaturage bari kwitara uko bashaka nkaho icyorezo cya Covid-19 kitagihari.
Akomeza avuga ko gufata ingingo zikenewe zo kuyirinda ari aho byaturutse hagamijwe kugabanya abashobora gukomeza kwandura.
Leta ya Ethiopia yatangaje amategeko yo mu bihe bidasanzwe mu kwezi kwa kane. Ayo mategeko yakuweho mu kwezi kwa cyenda.
Minisiteri y’ubuzima ivuga ko kugeza ubu abantu 91,118 ari bo bamaze kwandura iki cyorezo, 1,384 kirabica, mu gihe 44,505 bamaze gukira.
