Coronavirus:Umurwayi wabonetse muri Tanzaniya yari avuye i Burundi
U Burundi ni kimwe mu buhugu bike ku Isi bisigaye bitarabonekamo umurwayi w’indwara ya covid 19, nyamara habonetse umurwayi wavuyeyo.
Nkuko bigaragara mu nkuru ya BBC, Minisitiri w’ubuzima muri Tanzania yatangaje ko habonetse umurwayi mushya wa coronavirus mu gihugu, abayanduye ubu bakaba bamaze kuba 13.
Mu kiganiro n’abanyamakuru, minisitiri Ummy Mwalimu yavuze ko uyu bayibonyemo ari umushoferi w’amakamyo winjiye muri Tanzania avuye mu Burundi.
Mu Burundi, kuwa kabiri nijoro minisiteri y’ubuzima yasohoye itangazo rivuga ko nta murwayi wa ufite virus ya Covid-19 uraboneka mu gihugu.
Uwo bayisanze muri Tanzania ari mu ntara ya Kagera mu burengerazuba bwa Tanzania nk’uko minisitiri Mwalimu abivuga.
Madamu Ummy Mwalimu yavuze ko abantu bose babonyemo Covid-19 muri Tanzania umwe gusa muri bo ari we bayisanzemo adaheruka mu mahanga wahuye n’uwavuye mu mahanga.
Umuntu umwe mu bari barwaye coronavirus muri Tanzania yarayikize neza, uwo ni umugore witwa Isabella Mwampampa, ubu ugiye kuva mu kato.
Tannzania imaze gufata ibipimo by’iyi ndwara 273, muri byo 13 nibyo basanzemo iyi virus.
Ntakirutimana Deus
