Amerika: Abirabura bari kwicwa ku bwinshi na Coronavirus, biraterwa n’iki?
Abirabura muri leta zimwe za leta zunze ubumwe za Amerika ni bo baza imbere y’abandi mu kwicwa ku bwinshi na coronavirus.
Muri leta ya Louisiana, bibiri bya gatatu by’abicwa na Corona bari mu banyamerika b’abirabura. Muri iyo leta bagize icya gatatu cy’abayibamo nkuko tubikesha Ijwi ry’Amerika.
Leta ya Mississippi aho abirabura ari 38% by’abayituye , abari kwicwa na Coronavirus barenga icya kabiri, mu gihe leta ya Alabama 43% by’abapfa ari abirabura. Ibyo biri no muri leta za Illinois na Michigan, cyane cyane mu mijyi.
Abahanga bavuga ko ibyo biva ku kuntu abirabura basanzwe ari bo barwara kuruta abandi bitewe nuko bakunze kubura akazi gatuma babona ubwishingizi bwo kwivuza, bigatuma basohoka gushaka icyababeshaho bityo bakandura iki cyorezo.
Umuyobozi w’ikigo gishinzwe indwara z’ibiza muri Amerika, Anthony Fauci yatangaje ko kubera ubukene, abiraburea usanga barwaye indwara zirimo diyabete, umuvuduko w’amaraso, umubyibuho udasanzwe na asima.
Imibare y’abamaze kwandura iyi ndwara muri Amerika ni 434 856, abakize ni 24 058 mu gihe abo yahitanye ari 14 811.
Ntakirutimana Deus
