Amatora y’usimbura Kabila mu nzira zo kwimurwa
Amahanga ategerejanyije amatsiko amatora y’uzasimbura Joseph Kabila ku butegetsi bwa Congo Kinshasa, nyamara aya matora ashobora kwigizwa inyuma.
Imbarutso yabyo ngo Kabila udashaka kuva ku butegetsi; ibitangazwa n’uruhande rw’abatavuga rumwe na we bakomeje guteza ubwega imbere y’amahanga ko yagundiriye ubutegetsi. Ku ruhande rwa komisiyo yigenga y’amatora imbarutso ni ibikoresho byangiritse.
Ibi bituma bamwe bamwe bavuga ko aya matora ashobora kuzaba muri Gashyantare 2019, nyamara yari ateganyijwe tariki 23 Ukuboza 2018. Ku ruhande rwa komisiyo y’amatora, aya matora ashobora kongerwaho iminsi kugirango agende neza nk’uko The Source Post ibikesha 7sur7.
Intumwa y’iyi komisiyo y’amatora Jean-Pierre Kalamba yaciye amarenga igira iti ” Bibaye ngombwa ko hongerwaho iminsi 14 mu gihe amatora yari kubera, ese byaba ari bibi, aho kuyakora nabi usa n’usiganwa n’igihe?
Iyi komisiyo ivuga ko yasabye abatekinisiye bayo gukora ibishoboka amatora akabera igihe, ariko ngo hashobora kubaho irengayobora.
Bimwe mu biri gukorwa birimo gushyira uburyo bw’ibanga mu mashini zizifashishwa mu matora. Aha niho avuga ko igihe cyari giteganyijwe gishobora kwiyongeraho iminsi 4,5,7, 10 cyangwa 114.
Ukuri ku bivugwa kuri buze gutangazwa na Perezida w’iyi komisiyo uyu munsi saa Cyenda ku isaha yo muri Congo.
Mu minsi yashize imashini zizafasha mu matora, abatavuga rumwe na leta bita imashini zo kwiba amajwi(machines a voler) ziherutse gushya ubwo ibiro bya Ceni byafatwaga n’inkongi y’umuriro. Izisaga ibihumbi 7 icyo gihe zarakongotse.
Ntakirutimana Deus
