Umukecuru w’imyaka 116 yakize COVID-19
Umubikira w’umufaransa, umunyabulayi ushaje gusumba abandi bose mu Burayi , yarokotse Covid-19, mu gihe hasigaye iminsi mike ngo ahimbaze isabukuru y’imyaka 117 amaze avutse.
Lucile Randon, yiswe izina ry’ikibikira rya Mama Andre mu 1944, yamenyekanye ko yanduye coronavirus ku wa 16 z’ukwa mbere ariko nta bimenyetso na bimwe yagaragaje.
Yabwiye ibinyamakuru byo muri icyo gihugu ko atari azi uko yanduye iyi ndwara. Nyuma yaje kwitabwaho arakira nkuko BBC yabyanditse.
Mama Andre, ubu akaba atabona kandi agendera ku igare ry’abamugaye, aritegura guhimbaza yubile y’imyaka 117 ejo ku wa kane. Gusa azizihiza uwo munsi ari kumwe n’abantu bake cyane ugereranyije nuko byajyaga bikorwa mbere.
Umuvugizi w’ikigo cy’abageze mu za bukuru cya Sainte Catherine Labouré, David Tavella, agira ati: “Yagize amahirwe menshi”.
Yabwiye ikinyamakuru Var Matin ati: “Ntiyambajije ibijyanye n’ubuzima bwe, ahubwo yambajije ibijyanye n’imibereho ye. Yifuje kumenya niba amasaha yo gufungura no kuryama bigiye guhinduka”.
“Ntiyigeze yerekana ko atinya iyi ndwara. Ahubwo yari afitiye impungenge abandi basanzwe babana muri icyo kigo”.
Mamar Andre yavutse ku wa 11 z’ukwa kabiri mu 1904.
Azwiho ko ari we muntu wa mbere ushaje ku mugabane wa Burayi, azwi kandi nk’umuntu uza ku mwanya wa kabiri mu gukura ku Isi yose, nk’uko biri ku rutonde rw’ikigo Gerontology Research Group’s (GRG) gisanzwe gikora ubushakashatsi bwo kugaragaza abantu bashaje ku Isi.
Abajijwe n’ikinyamakuru cyo mu Bufaransa BFM niba yari afite ubwoba bwo kuba yaranduye Covid, Mama Andre yagize ati: “Oya, nta bwoba nari mfite, kubera ntatinya gupfa”.
“Ndanezerewe kuba ndi kumwe na mwe, ariko nifuza ko mba ndi ahandi hantu – hamwe na mukuru wanjye, sokuru wanjye na nyokuru wanjye”.
