Trump aremeza ko ibihugu bibeshya imibare y’abishwe na Coronavirus
Perezida Donald Trump yatangaje ko Amerika yarenze igihe cy’agasongero k’imibare y’abandura Covid-19, akemeza ko no mu bindi bihugu atari shyashya, akaba anateganya ko leta zimwe zishobora gusubira mu buzima busanzwe muri uku kwezi.
Mu ijambo avuga buri munsi uko iyi virus yifashe, Trump yavuze ko gahunda irambuye yo gufungura ubuzima busanzwe ivugwa kuri uyu wa kane amaze kuganira n’abategeka leta zigize Amerika.
Amerika ifite abantu barenga 638,000 babonyweho Covid-19 naho abarenga 30,800 yarabishe mu gihe cy’ukwezi n’igice gusa umuntu wa mbere apfuye azize iyi ndwara muri Amerika.
Yabwiye abanyamakuru ati: “Imibare irerekana ko twarenze agasongera mu bantu bandura. Turizera ko ibyo bizakomeza”.
Abajijwe impamvu muri Amerika ariho iyi virus iri kwica abantu benshi, Yashinje ibindi bihugu kubeshya imibare y’abapfa.
Avugamo n’u Bushinwa, ati: “Hari umuntu koko wemera imibare ya bimwe muri ibi bihugu?”
Yatangaje ko Amerika iri no kwiga ku makuru ataremezwa avuga ko iyi virus nshya ya Covid-19 yaba yaravuye muri laboratoire i Wuhan, aho kuva mu isoko nk’uko bizwi.
Ubutegetsi bwa Trump bwihaye itariki ya 01 z’ukwezi kwa gatanu nk’igihe cyo gusubiza igihugu mu buzima busanzwe, gusa Trump yavuze ko leta zimwe zishobora kubusubiramo na mbere y’icyo gihe.
Abajijwe ko bishobora guteza akaga mu gihe abantu basubiye mu buzima busanzwe vuba, Bwana Trump yasubije ati: “No mu gukomeza gufunga harimo urupfu”.
Yavuze ibijyanye n’indwara zo mu mutwe, ko nko kwiyahura bishobora kwiyongera cyane mu gihe ubukungu nabwo buri gushonga.
Miliyoni z’Abanyamerika zatakaje akazi kubera amategeko yo guhagarika ubuzima busanzwe, imibare y’abadafite akazi iri ku kigero kitigeze kibaho mbere muri Amerika.
Abaturage muri leta ya Michigan bigabije imihanda bamagana amategeko yo kubaheza mu ngo zabo.
Muri iyi leta ituwe n’abaturage hafi miliyoni 10, abarenga 27,000 banduye coronavirus naho 1,700 imaze kubica.
BBC
