Perezida Kenyatta yategetse ifungwa ry’umupaka wa Kenya na Tanzania na Somalia
Perezida Uhuru Kenyatta yategetse ifungwa ry’imipaka yose iyihuza na Tanzania na Somalia guhera saa sita z’ijoro kuri uyu wa gatandatu – usibye gusa ku bwikorezi bw’imizigo.
Abashoferi b’amakamyo gusa basanzwe bataranduye coronavirus ni bo bazemererwa kwinjira mu gihugu.
Mu cyumweru gishize, Perezida Kenyatta yavuze ko abashoferi 78 b’amakamyo basanzwe baranduye coronavirus ku mipaka y’iki gihugu, ndetse babuzwa kwinjira muri Kenya.
Perezida Kenyatta yanongereye igihe cy’umukwabu wo kuba ubuzima bwahagaze mu gihugu nta wucaracara, kuva nimugoroba kugera mu rukererera, icyo gihe kikazagera ku itariki ya 6 y’ukwezi gutaha kwa gatandatu.
Muri iyi minsi ba Perezida ba Uganda, u Rwanda,Sudani y’epfo na Kenya bari baganiriye ibijyanye no kunoza ubwikorezi mu muryango wa Afurika y’i Burasirazuba hirindwa coronavirus.
Ihagarirwa ry’ingendo ziva cyangwa zijya mu mijyi 5 mu yigize icyo gihugu, harimo na Nairobi, naryo ryongerewe igihe.
Bwana Kenyatta yavuze ko ubu muri Kenya hari abarwayi 481 ba coronavirus bari kwitwaho naho 50 ikaba imaze kubica – bivuze ko abandi bantu 5 bishwe na coronavirus mu masaha 24 ashize.
BBC
