Irani: Abandi 11 bashobora kunyongwa bazira “kwanga Imana”
Imiryango Iharanira uburenganzira bwa muntu muri Irani iravuga ko abantu benshi bashobora kwicwa bazizwa imyigaragambyo bakoze nyuma y’iyicwa ry’umukobwa ngo utari witandiye uko bikwiye.
Babitangaje nyuma y’uko ku wa kane icyo gihugu cyanyonze Mohsen Shekari w’imyaka 23. Uyu, yahamijweko yahohoteye umwe mu bashinzwe umutekano, mu cyaha cyiswe kwanga Imana nkuko VOA yabitangaje.
Wabisoma aha: Irani: umusore yonzwe mu azira kwanga Imana
Ubutabera bwa Irani abo bumaze kuvuga ko bazahanishwa ukunyongwa abantu 11. Abaharanira uburenganzira bwa muntu bo bavuga ko icyo gihano gishobora guhabwa abagera kuri 20.
Ishyirahamwe mpuzamahanga riharanira uburenganzira bwa muntu, Amnesty International, ryemeje ko mu bashobora kunyongwa vuba, harimo uwitwa Mahan Sadrat, ufite imyaka 22. Ashinjwa kuba yafatanywe icyuma mu myigaragambyo.
Imyigaragambyo abo bashobora kunyongwa bazira, bayikoze nyuma y’ifatwa n’ifungwa ry’umukobwa witwa Mahsa Amini, wafunzwe ashinjwa kutitwikira neza nkuko idini rya isilamu ribitegeka muri Irani. Abo mu muryango we n’inshuti za Mahsa Amini bemeza ko yazize uguhohoterwa yakorewe na polisi, polisi irabihakana.
Iyo myigaragambyo iyobowe n’abagore imaze gukwirakwira mu gihugu my mijyi 160 mu ntara 31 zose z’igihugu, ikaba iboneka ko ari cyo kibazo gikomereye ubutegetsi bwa ki-Islam kuva mu mpinduka zo mu 1979.
Abategetsi ba Iran bayifata ko ari “imyigaragambyo” ikorwa n’abanzi b’igihugu bari mu mahanga, bategeka inzego zishinzwe umutekano “kuyihosha nta mbabazi”.
Kugeza ubu, abantu 475 bari muri iyo myigaragambyo bamaze kwicwa, 18.240 nabo barafungwa, nk’uko bivugwa n’ishyirahamwe riharanira uburenganzira bwa muntu, Human Rights Activists’ News Agency (HRANA). Rivuga kandi ko abashinzwe umutekano 61 bamaze kwicwa.
ND
