Ingo mbonezamikurire zabaye umusemburo w’ubuzima bwiza ku bana bazijyanywemo

Ababyeyi b’abana bari bafite ikibazo cy’imirire mibi batangaza ko kubajyana mu rugo mbonezamikurire rw’abana bato  byagize impinduka mu buzima bwabo, ndetse ko babifata nk’imwe mu nzira yo gukemura ku buryo burambye iki kibazo.

Ibi bishimangirwa na bamwe mu babyeyi, bafite abana babo mu Rugo Mbonezamikurire rw’abana bato rw’i Munyinya, mu Murenge wa Shyogwe ho mu Karere ka Muhanga . Bavuga ko hari impinduka zigaragarira buri wese wari uzi abana babo batarajya muri iki kigo kubera imirire mibi.

Mugabekazi Goreth, umwe mu babyeyi bari bafite abana bagaragaraho ikibazo cy’imirire mibi, harimo n’abagwingiye, atanga ubuhamya bwe agira ati “Umwana wanjye kubera gucuka imburagihe yari afite ikibazo cy’imirire mibi. Ndibuka ko namuzanye hano umusatsi utangiye gucurama. Naramuzanye bamwitaho bamuha amafunguro atandukanye akize ku by’ibanze umubiri ukenera [uko batubwiye]. Natwe batwigishije uko bategura indyo yuzuye, ndabikora none umwana ubona ko mu myaka itanu y’amavuko afite ntaho atandukaniye n’abandi bangana.”

Mukamurigo Chantal, ukora umwuga w’ubuhinzi buciriritse na we avuga ko urugo mbonezamikurire rw’abana bato rwamufashije kongera kubona abana be bari bafite ikibazo cy’imirire mibi bongera kugira akabiri, ubu ngo bariga neza nta kibazo.

Agira ati “Kubera imibereho mibi, abana banjye babiri, bari bafite ikibazo cy’imirire mibi. Harimo umwe namenye ko yagwingiye ngeze mu Rugo Mbonezamikurire, kubera ko atakoraga nk’ibyo abana bari mu kigero kimwe bakora. Nyuma yo kutwigisha uko bategura indyo yuzuye n’uburyo umwana arerwa, hari byinshi byahindutse.”

Mukamurigo akomeza avuga ko, abana be batarajya muri urwo rugo yumvaga bazaba inzererezi, ariko izo mpungenge yazimazwe no kujyana abana muri iyo gahunda kuko ngo abana be bahigiye n’ikinyabupfura, bityo akizera ko ejo habo hazaba heza.

Ababyeyi batitabiriye gahunda yo kujyana abana babo mu bene izo ngo bavuga ko iyo bitereje uburyo abana bahajyanwe bagaragaje impinduka ku buzima bwabo, bicuza icyatumye batabajyanayo.

Uwitwa Rukundo Emile utuye mu Kagari ka Ruli mu Murenge wa Shyogwe avuga ko yarangaye ubwo abandi babyeyi bajyanaga abana babo muri izo ngo; ariko we ntabyiteho kuko atari asobanukiwe n’ibyazo. Yungamo ko ubujiji yagize butazongera, ndetse ko azajya anakangurira abandi kujyana abana babo muri bene izo ngo akurikije impinduka nziza yabonye kuri abo bana bazigiyemo ugereranyije n’abatarazigiyemo.

Nyiracumi Rachel, ushinzwe gahunda mbonezamikurire na gahunda z’abana muri Help a Child, avuga ko buri mu byeyi akwiye kugira umusanzu atanga kuri serivisi mbonezamikurire kugira ngo zitange umusaruro wifuzwa.”

Yagize ati “ Ingo mbonezamikurire,zubatswe ahantu hatandukanye hagomba kuba hari igikoni . Ntabwo icyo kimaze ari ugutekera abana bakarya gusa. ahubwo kigamije no gutanga inyigishisho zijyanye no gutegura indyo yuzuye, kugira ngo no mu rugo ababyeyi bage bayitekera abana ariko barabanje kubyigishwa.”

Akomeza asaba ababyeyi, guha umwanya izi nyigisho, kuko abenshi usanga bazi ibigize indyo yuzuye, ariko ugasanga nta bumenyi bwo ku yitegura bafite. Amara impungenge abavuga ko kuyitegura, ari iby’abakire ahubwo ko icyo Babura ari ubumenyi bwo kubikora bitagombera ibintu bihenze.”

Mu mwaka wa 2017 nibwo Leta y’u Rwanda yashyizeho, yo kubaka ibigo mbonezamikurire by’icyitegererezo, mu duce dutandukanye tw’igihugu, mu rwego rwo guhangana n’ikibazo cy’imirire mibi, no kugwingira ku bana bari munsi y’imyaka itandatu.

Ni mu gihe abana basaga ibihumbi 800, ni ukuvuga  38 ku ijana bagwingiye, bibabuza kwaguka uko bikwiriye mu buhanga n’ubwenge, mu ndimi ndetse no mu mibanire myiza n’abandi.

Akenshi abana batagaburiwe neza uko bikwiriye (barya nabi) igihe kinini baba bafite amahirwe menshi yo kudakora neza mu ishuri ndtese no kutaritsinda. 1% ry’abana b’ imyaka 3 no munsi babasha kubona serivisi za ECD. Abana bo mu miryango ikennye nibo bakunze kugwingira kurusha abana bakomoka mu miryango yifashije.

Ishami ry’Umuryango w’Abibumbye ryita ku bana (UNICEF) ndetse n’abandi bafatanyabikorwa bayo batangaza ko mu myaka yo kwigishwa, abana bakeneye kwegerezwa serivisi zibaha amahirwe yo kumenyana, guhura nabo bangana. Hagati y’imyaka 3 n’imyaka 5, abana baba bari kwagura imyitwarire yo kubana n’abandi yagutse, ubushobozi mu marangamutima, ubushobozi bwo gukemura ibibazo bimwe na bimwe ndetse no ubushobozi bwo kujijuka by’ibanze bukaba ari inking z’ingenzi zo kugira ubuzima bwiza,bwageze ku ntego.

Abana bakenewe kwegerezwa amahirwe y’inyigisho z’abakiri bato cyane biteguwe neza kuko bibafasha mu kwitegura neza ishuri risanzwe binabafasha kumenyana n’abo bangana. Bityo ngo kugaburira abana bato bihera ku ntera za mbere z’ubuzima. Ariko biterwa n’umuryango umwana arererwamo hagendeye kuri ibi bikurikira:

• Ibidukijije biri aho batuye, harimo aho kuba hatekanye, imisarane myiza, amazi yo kunywa asukuye ndetse n’ibonka ry’ibitabo n’ibikinisho bifasha gukangura ubwonko bw’umwana.
• Uburyo ababyeyi babana bakanaha umwanya umwana, bigaburira umwana ubushobozi bwo kwaguka mu mutwe (ubwenge n’ubuhanga), mu ngingo z’umubiri, mu marangamutima ndetse no mu kubana nabandi.

Ingo mbonezamikurire z’abana bato zigabanyije mu byiciro bitandukanye. Kugeza ubu mu Gihugu hose hari ingo mbonezamikurire z’abana bato  30,769. Inyinshi muri zo zikorera mu ngo zatoranyijwe kuko zigera ku bihumbi 25 zirimo abana barenga ibihumbi 900. Izi ngo zafashije kandi abagore barema amasoko mpuzamipaka, abasoroma icyayi n’abandi bakora imirimo mu buryo bwa rusange kuba bahasiga abana babo bagasigara bitabwaho, nabo bagakora nta mpungenge ko abana babo bahura n’ibibazo byatuma batamererwa neza.

NTAKIRUTIMANA Deus