Ibihano, utubari, amasaha y’ingendo no kwinjira muri Kigali byakajijwe kubera COVID-19
Inama y’Abaminisitiri yakajije ingamba zo kwirinda icyorezo cya COVID-19 nyuma y’izamuka ry’imibare y’abandura n’abapfa.
Iyabaye kuwa Gatatu tariki 26 Kanama 2020, imyanzuro igatangazwa kuwa Kane tariki 27 yagaragaje ingamba zivuguruye zo guhangana n’iki cyorezo.
Izo zirimo guhagarika ingendo zihuza Umujyi wa Kigali n’intara, zikorerwa mu modoka rusange. Icyakora abazikorera mu modoka zabo bazakomeza kuzikora ariko hubahirizwa amabwiriza y’inzego z’ubuzima.
Amasaha y’ingendo nayo yahinduwe avanwa kuri saa Kumi n’imwe z’igitondo kugeza sa Tatu z’ijoro, ashyirwa guhera saa Kumi n’imwe za mu gitondo kugeza saa Moya z’ijoro.
Ingendo kandi zo kuva no kujya mu karere ka Rusizi zakomeje guhagarikwa uretse amakamyo atwara ibicuruzwa.
Ikindi ni uko utubari twaba n’utwo muri za resitora tutemewe, ndetse hanavuzwe n’ibihano ku babirenzeho birimo gufunga ibikorwa by’ubucuruzi.
Abakozi ba leta bashishikarizwa gukorera mu rugo, mu biro hakajya abagera kuri 30%.
Izi ngamba zirimo n’izindi zagiye zihindurwa ugeraranyije n’izari ziriho zibaye mu gihe hari ubwandu butari bumenyerewe mu Rwanda (mu mibare), bwagaragaye mu Isoko rya Nyarungenge (Kigali City Market) n’iry’i Nyabugogo (kwa Mutangana) yaje gufungwa, ariko ubwandu bwahakomotse bwaratumye mu Rwanda hagaragara abarwayi bagera muri 200 ku munsi.
Mu Rwanda hamaze kuboneka abanduye COVID-19 bagera ku 3,625, muri rusange hapimwe, 383,481, abamaze gukira kugeza ejo hashize ni 1,810 abakirwaye ni 1,800, abapfuye ni 15.
Mu Rwanda icyorezo cya COVID-19 cyahagaragaye tariki 14 Werurwe 2020, ku muhinde wari uvuye i Mumbai muri Buhinde, nyuma hagenda hagaragara ubwandu bw’abavuye i Dubai. Ubwo bwandu bwaturutse hanze y’igihugu n’ubu buri guhererekanywa mu gihugu.
Yanditswe na Deus NTAKIRUTIMANA
