COVID-19: Amerika muri gahunda yo gukingira buri muturage bitarenze Gicurasi
Perezida Joe Biden wa Leta zunze ubumwe za Amerika yatangaje ko mu kwezi kwa gatanu bazaba bafite inkingo zihagije kuri buri munyamerika wese ufite imyaka y’ubukure, gusa ko gukingira bigomba kwagurwa n’abantu bakemera gukingirwa.
Yaburiye abantu “gukomeza kuba maso” kuko “urugamba rutararangira”, kuko amoko mashya y’iyi virus ateye inkeke.
Yaburiye ibibazo bishobora kuba muri leta zimwe zoroheje ingamba zo kwirinda zigamije kuzamura ubukungu bwazo.
Nubwo habaye kugabanuka kuboneka kw’abandura kuva uyu mwaka watangira – ubu abandura 68,000 ku munsi bari hasi ugereranyije na 300,000 ku munsi babonetse tariki 08 z’ukwa mbere – ariko muri iyi minsi abandura muri icyo gihugu bongeye kwiyongera.
Kugeza ubu Amerika imaze gutera abantu doze miliyoni 76 z’inkingo – zageze kuri 15.3% by’abatuye Amerika, mu nzira yo kugera kuri doze miliyoni 100 z’inkingo Biden yemeye ko zizaba zatanzwe mu minsi 100 ye ya mbere ku butegetsi.
Muri Amerika ubu bari gukingira doze miliyoni 1.74 buri munsi.
Ku isi, ibihugu byinshi biri mu nzira y’amajyambere byo ntibiragerwaho n’inkingo, mu minsi ishize OMS/WHO yo yanenze ibihugu bikize gucura inkingo ibikennye.
Ni iki kindi Biden yavuze?
Perezida Biden yavuze ko uruganda rukora imiti Merck – ruherutse guhagarika gukora urukingo rwarwo – ubu rugiye gufasha urwa Johnson & Johnson gutubura urukingo rwarwo ruterwa inshuro imwe ruherutse kwemezwa.
Biden yagize ati: “Turi mu nzira yo kubona inkingo kuri buri muturage wese mukuru muri Amerika bitarenze impera z’ukwa gatanu”. Avuga ko biri gushoboka “kubera ubufatanya bwa kompanyi bumeze nk’ubwabonetse mu ntambara ya kabiri y’isi”.
Yongeyeho ariko ko kubona inkingo ari kimwe, gukingira no kwemera gukingirwa bikaba ikindi.
Ati: “Dukeneye abakingira, abatera abantu inkingo ku maboko, miliyoni nyinshi z’amaboko y’abanyamerika.
“Ni inkuru nziza, ariko mukomeze mube maso. Ntibirarangira”.
Ikindi gikomeye mu byo yatangaje ni uko yasezeranyije ko buri mwarimu agomba nibura kuba yabonye doze imwe y’urukingo mu mpera z’uku kwezi, bikihutisha gutangira kw’amashuri yose.
Mu gufungura ubuzima bugasubira nka mbere, Perezida Biden yitwararitse, avuga ko atazi neza igihe ubuzima buzasubira nka mbere, nubwo ubushize yari yavuze ko ari “mbere y’igihe nk’iki umwaka utaha”.
Ivomo:BBC
