Congo: Bemba muri 6 bangiwe kwiyamamariza kuba perezida bitabaje ubutabera
Jean-Pierre Bemba, utavuga rumwe na leta ya Kabila ari mu bashakaga kuba abakandida 6 bangiwe gukomeza mu kindi kiciro bagannye urukiko rushinzwe kurinda itegeko Nshinga bavuga ko barenganyijwe.
Aba bakandida bakumiriwe mu bikorwa byo kwiyamamarizamu matora y’umukuru w’igihugu muri Republika iharanira demokarasi ya Congo bagejeje ibirego byabo kuri uru rukiko tariki ya 28 Kanam 2018.
Ingingo yo gukumira batandatu mu bakandida 25 bari biyandikishije kwitoza muri aya matora, yatangajwe na komisiyo ishinzwe amatora ku wa gatanu w’icyumweru gishize, babwirwa ko ufite ikibazo yakwihutira kugana urukiko rubishinzwe.
Muri bo harimo Jean Pierre Bemba wahoze uyoboye umutwe w’abarwanyi, akaba ari mu bakomeye barwanya leta ya Joseph Kabila, yatahutse mu gihugu tariki ya mbere z’ukwezi kwa munani kwitoza inyuma y’aho arekuriwe n’urukiko mpuzamahanga mpanabyaha, Icc aho yari amaze imyaka isaga 10 nk’uko VOA yabitangaje.
Uru rukiko rugiye gusuzuma iki kibazo mbere yo gutangaza urutonde ndakuka tariki ya 19 Nzeri 2018.
Mu gihe abakandida 19 muri 25 aribo bemerewe, Kiliziya Gatolika muri Congo iravuga ko hari abimwe amahirwe yo guhatana muri aya matora barimo na Moise Katumbi wangiwe kwinjira mu gihugu.
Abasenyeri Gatolika bavuga ko bikomeje gutya hari abazaba bavukijwe uburenganzira bwabo. Ibihugu birimo Amerika bivuga ko bifite impungenge kuri aya matora nyuma yuko Congo yanze inkunga iyifasha mu gutegura no gukota aya matora.
Ntakirutimana Deus
