Burkina Faso: Biravugwa ko Perezida Marc Kaboré yahiritswe ku butegetsi n’abasirikare
Amasasu yumvikanye mu ijoro ryakeye ahatuye Perezida wa Burkina Faso, Roch Marc Christian Kaboré ndetse no mu murwa mukuru Ouagadougou, ahari ibigo bya gisirikare.
Ni mu gihe bamwe mu basirikare b’icyo gihugu basaba ivanwaho ry’ababayoboye batabashije kurwanya inyeshamba ziyitirira idini rya Islam
Ibinyamakuru byo hanze bivuga ko Perezida Kabore afungiwe mu kigo cya gisirikare n’abasirikare bagumutse.
Ifoto yafatiwe mu murwa mukuru isa n’iyerekana imodoka ivugwa ko ikoreshwa n’ibiro by’umukuru w’igihugu yuzuye imyenge y’amasasu yajugunywe muri uwo murwa.
Umunyamakuru wa BBC Simon Gongo i Ouagadougou avuga ko umujyi utekanye . Hagati aho, abasirikare bakikije ahakorera televiziyo y’igihugu.
Ni mu gihe televiziyo y’igihugu yari yavuze ko amasasu yumvikanye ku bigo bya gisirikare ari agatsiko k’abasirikare barakaye bateje umutekano muke, ariko ko atari intambara yeruye cyangwa ihirikwa ry’ubutegetsi.
Abaturage benshi biraye mu mujyi gushyigikira ingabo z’icyo gihugu, ibyo byatumye leta ibuza abantu kugenda mu ijoro, ni mu gihe hari abatwitswe ahakorera ishyaka riri ku butegetsi.
Abasirikare 11 bashinjwa kugerageza guhirika ubutegetsi mu 2015 bafungiwe mu kigo cya gisirikare kiri mu burengerazuba bw’igihugu, ahakomeje kumvikana amasasu, ni ikigo cyitwaa Sangoule Lamizana.
Amasasu kandi yumvikanye mu kigo cya gisirikare mu mijyi ya Kaya na Ouahigouya iri mu majyepfo nkuko bivugwa na ambasade ya Amerika muri icyo gihugu
Aba basirikare biyomoye ku butegetsi basaba ibirimo :
- Kuvanaho umukuru w’ibiro bikurubya gisirikare hamwe n’umukuru w’urwego rushinzwe ubutasi
- Kuzana izindi ngabo ahari kubera imirwano ihanganishije ingabo n’inyeshyamba
- Kwita ku buryo bukwiye inkomere za gisirikare hamwe n’imiryango y’abaguye ku rugamba.
Mu ijambo yatangaje minisitiri w’ingabo Barthélémy Simporé yavuze ko habaye ibyo kurasana mu bigo bikeya bya gisirikare kandi ko nta kigo na kimwe cya leta cyatewe.
Jenerali Simporé yasabye abaturage gukomeza imirimo yabo kuko ngo leta izakomeza gutanga amakuru y’uburyo ibintu bihagaze.
Kugeza ubu ntawe uzi aho umukuru w’igihugu ari, ariko minisitiri w’ingabo yamaganye ibiri kuvugwa ku mbuga nkoranyambaga ko perezida yavanwe ku butegetsi.
Ubwicanyi bwakozwe n’abakekwa ko ari inyeshamba mu Gushyingo 2021, aho abantu 53 bishwe bwongereye uburakari abaturage bafitiye leta, butuma kandi haba ubwoba ko igisirikare gishobora gufata ubutegetsi – nk’uko byagenze mu gihugu gituranyi nka Mali mu kwa gatanu.
Ku wa gatandatu, abantu babarirwa muri mirongo bafatiwe i Ouagadougou bashinjwa gutegura imyigaragambyo itemewe, no gusebya leta ko yananiwe guhangana n’inyeshyamba.
Perezida Kaboré, yahoze ari umwe mu bakora mu bya banki mbere yo kujya ku butegetsi atsinze amatora yo mu 2015.
Aya matora ni yo yari aya mbere kuva Blaise Compaoré ahunze igihugu umwaka umwe mbere y’aho, ni nyuma y’imyigaragambyo y’abaturage bamaganaga ubutegetsi bwe bwari bumaze imyaka 27.
Inkuru The Source Post ikesha BBC
