Abasenyeri Gatolika bashyigikiye ko Kabila akurwa ku butegetsi
Abasenyeri Gatolika muri Repubulika Iharanira Demokarasi ya Congo basabye abatuye iki gihugu kuzibira inzira zose z’abifuza kwigumisha ku butegetsi.
Umuvugizi w’inama nkuru y’Abepiskopi muri congo, Padiri Donatien Nshole agira ati “Duhamagariye Abanyecongo gukomeza guhagarara kandi bari maso, baharanira ahazaza habo kandi bazibire mu mahoro n’umutekano abifuza kwigarurira igihugu baciye ukubiri n’inzira za demokarasi”.
Yabitangaje mu kiganiro yahaye abanditsi n’abamenyeshamakuru ku wa kane w’icyumweru gishize.
Intumwa zaserukiye Abepiskopi Gatolika mu Congo Kinshasa barakiriwe na Perezida wa Congo Brazaville, Denis Sassou Nguesso muri gahunda yo kwirinda icyatuma imibaniore ya kiliziya Gatolika na Leta igira ibibazo nkuko bigaragara kuri VOA.
Muri iki gihugu haravugwa ibibazo bya politiki nyuma yuko bigaragaye ko perezida Joseph Kabila ashaka kwikubira ubutegetsi yanze kuvaho, nkuko abishinjwa n’abatavuga rumwe na we.
Kabila yarangije manda yari yemerewe n’itegeko nshinga tariki ya 20 Ukwakira 2016.
Amatora yo gutegura uzamusimbura ategekanyijwe tarikiya ya 23 Ukwakira 2018.
