U Rwanda rwatangaje abantu bashya 17 barwaye Coronavirus
Minisiteri y’ubuzima mu Rwanda yatangaje abantu bashya 17 barwaye indwara iterwa na coronavirus, bityo umubare w’abayanduye ugera ku bantu 36.
Abenshi mu batangajwe kuri uyu wa mbere ni abavuye i Dubai bagera ku 9. Abandi bavuye mu bindi bihugu bitandukanyr birimo Kenya. Umuntu umwe yandujwe n’uwo bahuye wanduriye coronavirus hanze. Ni ukuvuga ko abandi 16 binjiye mu gihugu baramaze kwandura Coronavirus.
Iyi minisiteri ikomeza ivuga ko aba batangajwe ko banduye bapimwe hagati ya tariki 17-20 Werurwe, 2020 bose bashyizwe mu kato hanashakishwa abo baba barahuye na bo.
Imibare mishya y’Ishami ry’Umuryango w’Abibumbye ryita ku Buzima (OMS) igaragaza ko ku Isi abanduye bagera ku 334,981 habariwemo n’abavuwe bagakira, abagera ku 14,652 bahitanywe na Coronavirus, ubu icyorezo kigeze mu bihugu 190.
Mu karere imibare iragenda izamuka, Uganda yatangaje ko yabonye abantu 8 bashya banduye, bityo abanduye bose bamaze kuba 9 kandi abenshi ni abavuye Dubai.
Leta y’u Rwanda ikomeza kwibutsa abantu ingamba yafashe zigamije kubarinda iki cyorezo, bita ku isuku, kwirinda ingendo zitari ngombwa no gutanga amakuru ku ugaragayeho ibimenyetso.
Ntakirutimana Deus
