RD Congo: Abapadiri 10 batawe muri yombi, abigaragambya 6 baricwa

Inzego zishinzwe umutekano muri Repubulika Iharanira Demokarasi ya Congo zataye muri yombi abapadiri 10 hamwe  n’abaturage basaga 200 bari mu myigaragambyo basaba Perezida Joseph Kabila kuva ku butegetsi.

BBC dukesha iyi nkuru yatangaje ko Kiliziya Gatolika muri iki gihugu ari yo yahamagaje imyigaragambyo yo kwamagana uyu muyobozi warangije manda zigenwa n’amategeko ariho muri iki gihugu mu mwaka w’2016.

Abantu batandatu bishwe ku murwa mukuru Kinshasa, igihe polisi yakoreshaga ibyuka biryana mu maso n’amasasu  mu gukwiza imishwaro abari muri iyi myigaragambyo yakozwe no mu tundi duke twa Congo, ku Cyumweru tariki ya 21 Mutarama 2018.

Umuyobozi w’ishyirahamwe riharanira ubutabera muri iki gihugu Georges Kapiamba (Congolese Association for Justice) yatangarije  radiyo Okapi ya Loni uko bimeze.

Ati “Tumaze kumenya abapadiri 10 bafashwe barimo Padiri Dieudonne Mukinayi wo kuri paruwasi ya Binza Ozone. Afungiwe mu nzu y’umutegetsi ari muri leta kimwe n’abakirisitu 8,”

“Ku makuru dufite, bakomeje guhohoterwa. Imyenda yabo yaciwe . Ntawe uzi irengero ry’ababikira 2, abantu 257 bari mu myigaragambyo bafashwe, bakaba bafungiwe muri kasho zitandukanye za Kinshasa,”.

Umutwe w’abalayiki  “Lay Coordination Committee”, ishami rya kiliziya Gatolika , niwo wasavye ko haba imyigaragambyo mu gihugu cyose, kugira ngo basabe  ubutegetsi bushyire mu bikorwa  amasezerano yasinywe hagati ya leta n’amashyaka bitavuga rumwe tariki ya  31 Ukuboza  2016.

 Perezida Kabila warangije manda mu  kwezi kwa 12  mu mwaka w’i 2016, ariko akaba akiri ku butegetsi

Muri ayo masezerano yahagarariwe na Kiliziya Gatolika Kabila yagombaga gutegura amatora mu mwaka w’ 2017.