Pasiporo ya COVID-19 yemejwe izabuza abatarakingiwe kujya ahahurira abantu benshi
Inteko ishinga amategeko y’u Bufaransa yahaye Leta uburenganzira bwo gukurikiza ingingo yafashe zo guhangana n’icyorezo COVID-19, harimo na pasiporo yo kuba warahawe urukingo, ni ingingo yamaganiwe kure n’abadashyigikiye iby’urwo rukingo.
Iyi ngingo igiye gushirwa mu bikorwa mu minsi iri imbere, izabuza abatarafata urukingo rwa Covid-19, kwinjira ahantu hatandukanye nko mu maresitora, sinema, gari ya moshi zikora urugendo rurerure badafite pasiporo yemeza ko bakingiwe.
Kugeza ubu, abatarafata urwo rukingo bashobora kwinjira aho hantu ariko berekanye ko batanduye COVID-19. Hafi 78% by’Abafaransa bamaze guhabwa inkingo zose zisabwa, nkuko bitangazwa na minisiteri y’ubuzima.
Perezida Emmanuel Macron, yabwiye ikimnyamakuru Le Parisien cyo mu Bufaransa uku kwezi ko agamije kunaniza abanga gufata urwo rukingo.
Abatarafata urwo rukingo bakoze imyigaragambyo mu murwa mukuru Paris no mu yindi mijyi bamagana iryo tegeko.
VOA
