Karongi:Abantu 65 bafatiwe mu rugo rw’umuturage bahasengera

Abantu 65 bafatiwe mu rugo rw’umuturage bari kuhasengera, nyamara amateraniyo nk’aya yarahagaritswe mu rwego rwo kwirinda kwanduzanya no gukwirakwiza coronavirus.

Nk’uko ubutumwa bwahererekanyijwe bubigaragaza, ibi byabaye kuwa Gatandatu tariki 4 Mata 2020 mu mudugudu wa Kabeza, akagari ka Kibirizi mu murenge wa Rubengera ho mu karere ka Karongi. Bafashwe ahagana saa yine z’igitondo.

Ubutumwa bukomeza bugira buti “Mu rugo rw’uwitwa Mukamwiza Elina w’imyaka 79 na Habiyambere lzakari w’imyaka 56(musaza we) dusanzemo abantu barigusenga ni abantu 65 bavuga ko ari Abadivantisite bakijijwe biyomoye ku badiventiste.

Guteranira mu nsengero n’ahandi hahurira abantu benshi biri mu byatangajwe ko bibujijwe mu mabwiriza ya minisitiri w’intebe yatangaje mu rwego rwo guhangana na coronavirus. Biteganyijwe ko aya mabwiriza azubahirizwa kugeza tariki 19 Mata 2020.

Mu turere turimo Musanze abantu nk’aba bateranira mu ngo cyangwa ahandi hatemewe muri iki gihe bagiye bafatwa bagashyikirizwa urwego rw’ubugenzacyaha (RIB).

Turacyagerageza kubaza inzego zibishinzwe ku bijyanye n’igikurikiraho…..

Ntakirutimana Deus