Covid-19 yishe abantu benshi umunsi umwe kurusha iyindi mu Rwanda
Inzego z’ubuzima mu Rwanda zatangaje ko abantu 22 bishwe na Covid-19 ejo hashize, uyu niwo mubare munini utangajwe w’abamaze guhitanwa n’icyo cyorezo umunsi umwe.
Izo nzego zatangaje ko abapfuye tariki 12 Nyakanga 2021 ari abagore umunani n’abagabo 14 bo mu turere dutandukanye ariko biganjemo abo mu Mujyi wa Kigali.
Abo ni abagore 8 b’imyaka 88,83,35 bo mu Mujyi wa Kigali, hari umugore w’imyaka 82 w’i Muhanga, abafite 76,45 b’i Musanze, uwa 60 w’i Rubavu n’uwa 59 wo mu Ruhango. Abagabo hapfuye 14 barimo uw’imyaka 91 wo mu Ruhango, muri Kigali ni barindwi bafite imyaka 85,62,61,55,39,38,31 mu gihe muri Rubavu ari umwe w’imyaka 69, n’ab’i Musanze bane bafite imyaka 67,62,40,37 ndetse n’uw’i Huye w’imyaka 61.
Itangazo risohorwa buri munsi na Minisiteri y’ubuzima rigaragaza ko habonetse abanduye bashya 772 mu gihe hakize 833.
Ijanisha ry’abandura ryongeye kwiyongera kuko tariki 11 Nyakanga ryari 7.7% ubu ryabaye 11.5%. Abarembye babaye abantu 70., uturere tuza imbere mu kugira abanduye benshi ni Umujyi wa Kigali, Kamonyi na Musanze.
Mu minsi irindwi ishize, habonetse abantu 5,620 bashya banduye n’abantu 103 bapfuye. Ikindi cyumweru kiruta ibindi mu mibare.
Mu cyumweru gishize, Col Dr Tharcisse Mpunga, umunyamabanga wa leta ushinzwe ubuzima yabwiye RBA ko abarwayi babaye benshi ku buryo ibitaro byabakiraga byari byarafunze byingeye gufungurwa hakuzura abarwayi barimo abarembye.
Yunzemo ati: “Iki ni igihe tutigeze tugeramo kuva twaterwa n’iki cyorezo”.
Ibi byose biraterwa nukon u Rwanda kimwe n’ibindi bihugu rwugarijwe n’inkubiri nshya ya Covid, yiswe Delta nkuko inzego z’ubuzima zibyemeza. Ikindi ngo ni abantu badohotse ku ngamba zo kwirinda.
