COVID-19: U Buhinde bwabaye buhagaritse kohereza mu mahanga inkingo za AstraZeneca
U Buhinde bwabaye buhagaritse iyohereza mu mahanga iryo ari ryo ryose ry’inkingo za Oxford-AstraZeneca za coronavirus, nkuko abategetsi bo muri minisiteri y’ububanyi n’amahanga babibwiye BBC.
Bavuze ko kwiyongera kw’abanduye kuvuze ko abacyenera uru rukingo mu gihugu bagiye kwiyongera mu byumweru biri imbere, ko rero doze z’uru rukingo zicyenewe mu gukingira mu Buhinde.
Biteganyijwe ko iki cyemezo – abategetsi bise ‘gufunga by’akanya gato’ – kigira ingaruka ku ngano y’inkingo ku isi, kugeza mu mpera y’ukwezi kwa kane.
Ibihugu bigera ku 190 – birimo n’u Rwanda – biri muri gahunda y’ishami ry’umuryango w’abibumbye ryita ku buzima (OMS/WHO) yo gusaranganya inkingo izwi nka Covax, bishobora kugirwaho ingaruka.
Mu ntangiriro y’uku kwezi, Leta y’u Buhinde yahaye iy’u Rwanda impano ya doze 50,000 z’inkingo za AstraZeneca.
Mu bihugu bitandukanye bya Africa hari abamaze guterwa doze ya mbere y’urukingo bategereje iya kabiri, mu gihe ibyo bihugu nabyo bitegereje icyiciro cya kabiri cy’inkingo zo muri gahunda ya Covax, ziganjemo iziva mu Buhinde.
Ikigo cy’u Buhinde gitubura inkingo nyinshi kizwi nka Serum Institute of India (SII), mu minsi ya vuba ishize cyatinze kohereza inkingo za AstraZeneca mu bihugu byinshi, birimo Ubwongereza na Brazil.
Kugeza ubu, u Buhinde bwohereje doze zirenga miliyoni 60 z’inkingo mu bihugu 76, nyinshi muri izo doze ni iz’urukingo rwa Oxford-AstraZeneca.
Kuki u Buhinde bwafashe iki cyemezo?
Iki cyemezo kije mu gihe u Buhinde burimo guhangana n’ukwiyongera kw’abanduye coronavirus.
Ku wa gatatu, muri iki gihugu habonetse ukwiyongera kwa mbere kwinshi ku munsi umwe kuva uyu mwaka watangira, abantu bashya barenga 47,000 baranduye naho 275 barapfa.
Guhera ku itariki ya mbere y’ukwezi kwa kane, u Buhinde bugiye gutangira gukingira abafite hejuru y’imyaka 45, kandi abategetsi biteze ko abacyeneye gukingirwa biyongera.
Umutegetsi wo muri minisiteri y’ububanyi n’amahanga yabwiye BBC ati: “[Guhagarika kohereza mu mahanga] ni ingamba y’igihe gito. Abacyeneye inkingo mu gihugu ni bo bagomba kwibandwaho”.
Abategetsi bo muri minisiteri y’ububanyi n’amahanga y’u Buhinde bavuze ko bishoboka ko hazabaho igabanuka ry’inkingo kugeza mu kwezi kwa kane.
Ariko bavuze ko ibintu bishobora kongera gutangira gusubira mu buryo mu kwezi kwa gatanu, ubwo byitezwe ko nibura urundi rukingo rumwe rw’inyongera ruzaba rwahawe uruhushya rwo gukoreshwa byihutirwa.
Kuva ku wa kane ushize, nta nkingo zivuye mu Buhinde zoherejwe mu mahanga, nkuko byatangajwe ku rubuga rwa internet rwa minisiteri y’ububanyi n’amahanga.
Umwe mu bakora muri minisiteri y’ububanyi n’amahanga yabwiye ibiro ntaramakuru Reuters ati: “Buri kindi kintu cyose cyabaye gihagaze, nibura kugeza muri aka kanya”.
“Nta kohereza mu mahanga, nta kintu na kimwe [kugeza] ibintu mu Buhinde bituje”.
Nta cyo leta y’u Buhinde cyangwa ikigo SII gitubura inkingo bari batangaza ku mugaragaro kuri icyo cyemezo.
Ivomo: BBC
