FERWAFA yatangaje impinduka mu gihe shampiyona izaba isubukuwe
Ishyirahamwe ry’umupira w’amaguru mu Rwanda FERWAFA ryamenyesheje amakipe yose ko azasubukura amarushanwa abakinnyi baba hamwe mu mwiherero, ni mu gihe yasubitswe abakinnyi bataha mu miryango yabo.
FERWAFA yabitangaje binyuze mu mabwiriza avuguruye yo ku wa 3 Mutarama 2022. Ikindi ni uko abo bakinnyi bazajya baba hamwe mu mwiherero bazajya bapimwa COVID-19 mu buryo bwihuse ‘rapid test’ nibura buri masaha 48 ndetse no ku munsi w’umukino.
Kuri uyu wa Kabiri saa Kumi z’umugoroba FERWAFA iri mu nama n’amakipe y’Icyiciro cya mbere n’icya kabiri mu bagabo n’abagore kugira ngo higwe ku iyubahirizwa ry’aya mabwiriza yo kwirinda COVID-19.
Icyorezo COVID-19 cyateje impinduka mu mikinire n’imitegurire ya shampiyona aho gusoza umwaka w’imikino 2020 byabaye ngombwa ko abakinnyi baba hamwe mu macumbi.
Impinduka zitangajwe na FERWAFA zije nyuma yuko Minisiteri ya siporo yari iherutse gutangaza ko ibikorwa bya siporo bihagaze mu gihe cy’ukwezi, abakurikirana ibya siporo bakanenga icyo cyemezo, umuyobozi w’iyo minisiteri akavuga ko na mbere ho ibyumweru bibiri shampiyona ishobora gutangira.
