Abadepite babiri bashyigikiye Bobi Wine bafunzwe bakekwaho ubwicanyi
Abadepite babiri bo mu ishyaka ritavuga rumwe n’ubutegetsi National Unity Platform (NUP) barezwe ubwicanyi bwakorewe mu karere ka Masaka, ni nyuma bafashwe bagafungwa.
Kuwa mbere, depite Allan Ssewanyana na Muhammad Ssegirinya bahamagajwe n’ubugenzacyaha ngo babazwe, bahita baregwa ubwicanyi bw’i Masaka barafungwa.
Kuwa kabiri nyuma ya saa sita nibwo bagejejwe mu rukiko rw’i Masaka.
Muri ako karere, mu byumweru bishize abantu bagera kuri 26 bishwe hakoreshejwe ibikoresho gakondo nk’imipanga, abarenga 10 muri bo bari abarengeje imyaka 50.
Ku wa mbere, umuvugizi wa polisi yari yabwiye abanyamakuru ko abanyapolitiki babiri aribo bacuze umugambi w’ubu bwicanyi mu nama zakorewe hafi y’i Kampala.
Hari abandi bantu 12 bo muri ako gace bafunzwe bashinjwa ubu bwicanyi.
Hon. Mathias Mpuuga, ukuriye abatavugarumwe n’ubutegetsi mu nteko ishingamategeko akaba n’umukuru wungirije wa NUP, yabwiye BBC ko ibiregwa bagenzi be ari ibihimbano bya leta bigamije kwangisha ishyaka ryabo rubanda.
Mu kwezi gushize, Perezida Yoweri Museveni avuga kuri ubu bwicanyi, yavuze ko “nta uzica Abanya-Uganda ngo abikire cyangwa aneshe leta mu gisirikare cyangwa politike”.
Ni inshuro ya gatatu mu myaka ya vuba habaye ubwicanyi nk’ubu muri Masaka.
Mu 2016 na 2018, habaye ubwicanyi nk’ubu bwibasira abaturage, hari abantu bafashwe barafungwa ariko nta rubanza na rumwe rwarangijwe. (BBC)
