Mali: Umugabo washinjwaga kugerageza kwica Perezida yapfiriye mu bitaro arinzwe
Umugabo washinjwaga ko mu cyumweru gishize yagerageje gutera icyuma Perezida w’inzibacyuho wa Mali Col Assimi Goïta, yapfiriye mu bitaro arinzwe, nkuko leta ibivuga.
Uwo mugabo, utatangajwe izina, yatawe muri yombi nyuma y’ibivugwa ko ari umugambi wapfubye wo kugerageza gutera icyuma Perezida. Byabaye ubwo Bwana Goïta yari mu masengesho mu musigiti.
Itangazo rya leta ya Mali ryavuze ko ubuzima bw’uwo mugabo bwarushijeho kuba bubi aho yari afungiye, ajyanwa ku bitaro, ari na ho yapfiriye.
Bivugwa ko icyateje urupfu rwe kirimo gukorwaho iperereza.
Goïta yahiritse ubutegetsi bubiri muri Mali kuva mu kwezi kwa munani mu 2020 nkuko BBC yabitangaje.
Uko bashatse kwica perezida
Bivugwa ko abo bagabo bashatse kwica perezida mu gihe yari mu masengesho yo guhimbaza umusi mukuru w’aba Islam wa Eid al-Adha. Icyo gihe perezida Col. Assimi Goïta yavuze ko ari “kimwe mu biranga kuba umuyobozi”.
Hari nyuma nyuma y’amasaha make abagabo babiri bagabye igitero ku musigiti Grande Mosquée mu murwa mukuru Bamako. Amakuru avuga ko umwe muri aba bagabo yari afite icyuma maze agerageza gucumita Col. Goïta wari uyoboye itsinda ry’abasirikare bahiritse ubutegetsi mu kwa munani k’umwaka ushize.
Ariko ntibashoboye no kumurya urwara kuko bahise bafatwa.
