Irani yanyonze umuntu azira “Kwanga Imana”
Iran itangaza ko yanyonze umuntu wa mbere wahamwe n’icyaha cyo kujya mu myigaragambyo iheruka yo kurwanya leta.
Mohsen Shekari yanyonzwe mu gitondo cyo kuri uno wa kane, nyuma y’aho urukiko rumuhamirije icyaha cyo kwanga Imana.
Mu makuru BBC dukesha iyi nkuru nayo ikesha ibinyamakuru byegamiye kuri leta, uwanyonzwe yari uwivumbuye, yigaragambirije mu murwa mukuru arongera kandi akomeretsa umusirikarw n’icyuma.
Umwe mu baharanira uburenganzira bwa muntu avuga ko yahamijwe icyaha mu buryo bw’uburiganya.
Mahmood Amiry-Moghaddam, umukuru w’ishyirahamwe rya Iran riharanira uburenganzira bwa muntu rifite icyicaro muri Norvège, Iran Human Rights, yanditse kuri Twitter ko ibyo kunyonga abari mu myiaragambyo bishobora gutangira gukorwa buri munsi mu gihe abategetsi ba Iran batabona “ingaruka nyazo vuba na bwangu ku rwego mpuzamahanga”.
Ubucamanza bwa Iran kugeza ubu butangaza ko abantu 11 bakatiwe igihano cy’urupfu ku ruhare bagize mu myigaragambyo yatangiye hagati muri Nzeri nyuma y’urupfu rwa Mahsa Amini, umugore w’imyaka 22 wari wafashwe na polisi ishinzwe imyitwarire imushinja ko yambaye “nabi” umwambaro wa kiyisilamu bitwikira mu mutwe (hijab).
Iyo myigaragambyo iyobowe n’abagore imaze gukwirakwira mu gihugu my mijyi 160 mu ntara 31 zose z’igihugu, ikaba iboneka ko ari cyo kibazo gikomereye ubutegetsi bwa ki-Islam kuva mu mpinduka zo mu 1979.
Abategetsi ba Iran bayifata ko ari “imyigaragambyo” ikorwa n’abanzi b’igihugu bari mu mahanga, bategeka inzego zishinzwe umutekano “kuyihosha nta mbabazi”.
Kugeza ubu, abantu 475 bari muri iyo myigaragambyo bamaze kwicwa, 18.240 nabo barafungwa, nk’uko bivugwa n’ishyirahamwe riharanira uburenganzira bwa muntu, Human Rights Activists’ News Agency (HRANA). Rivuga kandi ko abashinzwe umutekano 61 bamaze kwicwa.
ND
