Umutwe M23 wahagaritse imirwano

Inyeshyamba za M23 zimaze iminsi mu mirwano n’ingabo za leta ya DR Congo zatangaje ko zibaye zihagaritse imirwano.

Itangazo ryazo rivuga ko kuva none kuwa gatanu M23 irekuye ibice yari yarafashe igasubira “mu birindiro byo kwirinda” kugira ngo “habe akarere kanini kadutandukanya” n’ingabo za leta “mu kwirinda imirwano”.

Abajijwe ibyo birindiro byabo, Major Willy Ngoma uvugira uyu mutwe yabwiye BBC ati: “Turi ku misozi ya Tchanzu na Runyoni” – uduce bongeye kwigarurira muri iki cyumweru.

Ku ruhande rwazo, ingabo za leta ya DRC zo zatangaje ko zashenye ibirindiro bikuru (Etat major) bya M23.

Umuvugizi wa FARDC muri Kivu ya ruguru, Lt Col Ndjike Kaiko, yavuze ko ibyo birindiro byari hafi y’ikirunga cya Sabyinyo bakaba babishenye.

Imirwano yahereye mu rukerera kuwa mbere yatumye abarenga 24,000 bava mu byabo mu duce tw’imirwano muri teritwari ya Rutchuru y’intara ya Kivu ya ruguru, benshi bahungiye muri Uganda, nk’uko ONU ibivuga.

Iyi mirwano kandi yatumye hahanurwa kajugujugu ya UN yagenderaga mu gace k’imirwano yapfiriyemo abasirikare umunani ba MONUSCO bo muri Pakistan, Uburusiya na Serbia.

Impande zombi zashinjanye kurasa iyi ndege, ONU ntiratangaza amakuru arambuye ku ihanuka ryayo.

Ikarita yerekana Chanzu muri DR Congo

Izi nyeshyamba ziyobowe na Gen Sultani Makenga zavuze ko zitangaje aka gahenge kugira ngo abategetsi bategure “ibiganiro mu mahoro byo gushaka umuti w’ikibazo kidutandukanya kimaze imyaka irenga 10”.

Mu gihe ihagaritse imirwano, M23 ivuga ko ifite “uburenganzira bwo kwitabara mu buryo bukomeye” mu gihe yakongera guterwa n’ingabo za leta.

Lt Col Ndjike Kaiko wewe avuga ko “FARDC itazemera na rimwe ko M23 igira ibirindiro ku butaka bwa Congo” kandi ko biteguye “gutera”.

Buri ruhande rushinja urundi ko ari rwo rwatangije imirwano rutera ibirindiro by’urundi.

BBC

Leave a Reply

Your email address will not be published.