Congo: Nta gupimwa Covid-19 ku wayikingiwe ushaka kujyayo

Leta ya Repubulika ya Demokarasi ya Congo yatangaje ko umukwabu wa nijoro wo kwirinda ikwirakwira rya Covid-19 uvanyweho mu gihugu hose uretse mu ntara z’iburasirazuba zikirimo ibihe bidasanzwe.

Ni icyemezo cyatangajwe n’ibiro bya Perezida Félix Tshisekedi nyuma y’inama yagiranye kuwa mbere n’itsinda ry’abategetsi bashinzwe kurwanya iki cyorezo.

Ikindi cyemezo cyafashwe ni ukuvanaho igipimo cya Covid-19 mu kwinjira ku butaka bwa DR Congo, no ku bagenzi b’imbere mu gihugu, ku bantu bakingiwe byuzuye.

Kuva iki cyorezo cyagera muri DR Congo abashinzwe ubuzima bavuga ko abarenga 85,000 ari bo bacyanduye naho abagera ku 1,300 aribo kimaze kwica.

Iyi mibare ariko bamwe mu mpirimbanyi bagiye bavuga ko itajyanye n’ukuri kw’ibyo iki cyorezo cyarakoze muri DR Congo.

Ishami rya ONU rishinzwe ubuzima ku isi rivuga ko kugeza ubu abantu barenga miliyoni 410 ku isi banduyeho Covid-19 mu gihe abarenga miliyoni 5.8 yabishe kuva yaza mu 2020.

DR Congo
Inama yo kuwa mbere iyobowe na Perezida Tshisekedi yafashe ibyemezo ku ngamba zo kwirinda Covid

Kubera kugabanuka kw’abandura no kwiyongera kw’abikingiza, ibihugu byinshi – cyane cyane ibiteye imbere – birimo kuvanaho amabwiriza yose byashyizeho yo kwirinda Covid.

Ayo arimo kwambara agapfukamunwa, kutajya ahari abantu benshi, kwipimisha kugira ngo winjire mu gihugu, Covid passports, akato, n’ibindi…

Nka Denmark ni igihugu cyasubiye mu buzima busanzwe kuva tariki 01 z’uku kwa Gashyantare (02) aho bavuze ko Covid “ntikiri ikibazo gihangayikishije sosiyete”.

Leta ya DR Congo yatangaje ko kuba yavanyeho ziriya ngamba “bitavuze ko icyorezo kirangiye”, ko izindi ngamba zizakomeza kubahirizwa.

BBC

Leave a Reply

Your email address will not be published.