Gineya: Abasirikare bafashe ubutegetsi bafunguye abanyapolitiki batavugaga rumwe na Conde

Abasirikare bafashe ubutegetsi muri Gineya babohoje abanyepolitike hafi 20 batavuga rumwe n’ubutegetsi bwa Alpha Conde bari bafunze.

Igisirikare cyafashe ubutegetsi ku cyumweru , cyavuze mu ntangiriro y’iki cyumweru ko kigiye kwihutisha kurekura imbohe za poritike muri icyo gihugu. Ni mu gihe ibihugu byo mu burengerazuba bwa Afrika bihuriye muri CEDEAO, biri mu myiteguro yo kuganira ku bibazo bihari.

Alpha Conde yafunze abatavuga rumwe n’ubutegetsi bwe barenga 10, ni nyuma y’ibibazo bishingiye ku matora byabaye mu mwaka ushize.

Umunyamakuru wa AFP yavuze ko yiboneye abagera kuri 20 bafunguwe muri gereza yo mu murwa mukuru Conakry, ku mugoroba wo kuri uyu wa kabiri, barimo abatavuga rumwe n’ubutegetsi.

Abunganira abo banyapolitiki bavuze ko 79 bari ku rutonde rw’abarekurwa, nyuma y’ibiganiro bagiranye n’igisirikare.

Igisirikare cyasohoye itangazo kuwa mbere risaba minisiteri y’ubutabera kwihutisha kurekura abanyepolitike batawe mu yombi. (VOA)

0Shares

Leave a Reply

Your email address will not be published.