Amerika: Urukiko rwatangiye guhana abagabye igitero ku Nteko Ishinga Amategeko

Muri Leta zunze ubumwe z’Amerika, urukiko rwo ku rwego rw’igihugu rwakatiye igihano cyo gufungwa umuntu wa mbere na mbere mu baregwa igitero ku ngoro y’inteko ishinga amategeko-Congress

Yitwa Paul Allard Hodgkins. Afite imyaka 38 y’amavuko. Ni uwo muri leta ya Florida, mu majyepfo ya Leta zunze ubumwe z’Amerika. Ku italiki ya 2 y’ukwezi gushize, yagiranye n’ubushinjacyaha amasezerano yo kwemera icyaha cyo kubangamira imikorere y’urwego rw’ubutegetsi no kwishyura guverinoma indishyi y’amadolari ibihumbi bibiri.

Asoma urubanza, umucamanza yatangaje ko Hodgkins yagize uruhare rugaragara muri kimwe mu bikorwa bibi cyane mu mateka y’Amerika. Ati: “Ntibyari imyigaragambyo na gato. Byari igitero kuri demokarasi, kizasiga ibikomere ku gihugu imyaka myinshi iri imbere.” Ariko avuga ko Hodgkins akwiye igihano gito ku cyo ubushinjacyaha bwari bwamusabiye cyo gufungwa umwaka umwe n’igice. We yamukatiye gufungwa amezi umunani.

Avoka wa Hodgkins we yari yasabiye ko umukiliya we kutoherezwa muri gereza. Ariko umucamanza, mu myanzuro ye, yavuze, ati: “Turetse abantu bakagaba ibitero kuri Capitol, ingoro y’inteko ishinga amategeko y’igihugu, twaba dukoze iki kugirango tubugabunge demokarasi?”

Imbere y’umucamanza, Hodgkins yicuje icyaha, avuga ko gikojeje isoni, maze asaba imbabazi.

Paul Allard Hodgkins abaye uwa mbere ukatiwe igihano cyo gufungwa kubera uruhare yagize mu gitero cy’abayoboke b’uwari umukuru w’igihugu, Donald Trump, kuri Capitol ku italiki ya 6 y’ukwezi kwa mbere gushize. Igitero cyaguyemo abantu batanu. Abandi bantu barenga 500 bategereje nabo kuburana.

(VOA/AP/Reuters)

 

0Shares

Leave a Reply

Your email address will not be published.