Ethiopia: Inyeshyamba zafashe undi mujyi muri Tigray

Inyeshyamba zo mu karere ka Tigray mu majyaruguru ya Ethiopia zikomeje gutera intambwe nyuma yuko zigaruriye umurwa mukuru Mekelle w’ako karere ziwambuye ingabo za leta.

Inyeshyamba ubu noneho zinjiye mu mujyi wa Shire, uri mu ntera ya kilometero hafi 140 mu majyaruguru ashyira uburengerazuba, nkuko abategetsi bo mu muryango w’abibumbye (ONU/UN) babivuga.

Abashyigikiye inyeshyamba mu karere ka Tigray muri Ethiopia bishimira ko ingabo za Eritrea zavuye mu mujyi wa Shire

Mbere yaho, ingabo za Eritrea zirwana ku ruhande rw’ingabo za leta ya Ethiopia zari zavuye muri uwo mujyi nkuko BBC yabyanditse.

Leta ya Ethiopia yatangaje agahenge muri iyi mirwano imaze amezi hafi umunani, ariko inyeshyamba zasezeranyije kwirukana “abanzi” bakava muri Tigray.

Imirwano hagati y’umutwe Tigray People’s Liberation Front (TPLF) – ubu wifatanyije n’indi mitwe bagakora umutwe wa Tigray Defence Forces (TDF) – n’ingabo za leta imaze kwicirwamo abantu babarirwa mu bihumbi.

Abantu barenga miliyoni ebyiri bataye ingo zabo, naho abagera ku 350,000 babayeho mu nzara, nkuko ONU ibivuga.

Imirwano yatangiye mu kwezi kwa cumi na kumwe mu 2020, ubwo TPLF yangaga amavugurura muri politiki igafata ibigo by’ingabo za leta. Ingabo za leta ya Ethiopia zafashe Mekelle nyuma yaho muri uko kwezi.

Ku wa kabiri abashyigikiye inyeshyamba bishimiye mu mihanda yo mu murwa mukuru w’ako karere, hashize umunsi zisubije uwo mujyi mu gitero cyihuse. Leta ya Ethiopia yatangaje “agahenge ko gutuma imfashanyo itangwa” aho ngaho.

Imodoka y'intambara y'ingabo za Ethiopia yatwikiwe muri Tigray mu kwezi kwa gatatu mu 2021.Ifoto yo mu bubiko igaragaza imodoka y’intambara y’ingabo za Ethiopia yatwikiwe muri Tigray mu kwezi kwa gatatu uyu mwaka

Umuvugizi w’inyeshyamba Getachew Reda yabwiye ibiro ntaramakuru Reuters ko abarwanyi bo muri Tigray “bazasenya umwanzi” binjira mu karere ka Amhara – aho imitwe yaho na yo yafashije ingabo za leta mu mirwano.

Yagize ati: “Tugomba gutuma umwanzi… atagira ubushobozi ukundi bwo gushyira ku nkeke umutekano w’abantu bacu”.

Aho ingabo za Eritrea zerecyeje ntabwo haramenyekana, ariko umuturage wo mu mujyi wa Shire yabwiye Reuters ko izo ngabo zagaragaye nk’izerecyeza mu majyaruguru, ahagana ku mupaka.

Ubu inyeshyamba zimaze kwigarurira igice kinini cya Tigray, nkuko byavuzwe n’ikigo cy’ubushakashatsi ku makimbirane International Crisis Group.

0Shares

Leave a Reply

Your email address will not be published.