Batatu mu bakingiwe COVID-19 mu Rwanda barapfuye

Abantu batatu mu basaga ibihumbi 400 bamaze gukingirwa COVID-19, barapfuye, inzego z’ubuzima zikaburira ababwira ko gukingirwa bishobora gutuma umuntu atandura cyangwa ngo yanduze.

Iyi mibare ije ikurikira iy’abantu 400, ikigo cy’ubuzima mu Rwanda-RBC giherutse gutangaza ko basanze baranduye COVID-19 nyuma yo kuyikingirwa. Icyakora Dr Nsanzimana Sabin uyobora icyo kigo avuga ko abenshi mu banduye ari abari barakingiwe inshuro imwe basanze baranduye.

Dr Sabin aganira na Radiyo&TV1 yavuze ko abapfuye batishwe nuko bakingiwe iyo ndwara, ahubwo byatewe n’indwara zidakira bari barwaye kandi mu buryo bukomeye. Muri bo ngo harimo uwari urwaye kanseri yo ku rwego rwa nyuma n’uwari urwaye umutima.  Akomeza avuga ko nkuwa kanseri bamukingiye ageze habi ari ukumufasha bakamuha amahirwe ngo aticwa na Coronavirus.

Yibutsa abakingiwe ko batagomba kwirara kuko bashobora kwandura no kwanduza, gusa ngo ntabwo baremba nk’abadakingiye.

Mu kiganiro aherutse kugirana n’abanyamakuruDr Nsanzimana yagize ati “Mu bipimo tumaze iminsi dufata, hagaragaye abantu 400 banduye kandi baramaze gukingirwa. Abakingiwe ntibagomba kwirara bumva ko gukingirwa bikuraho kwandura no kwanduza abandi.”

Abamaze gukingirwa mu Rwanda kugeza ubu basaga ibihumbi 400 hakoreshejwe inkingo za Pfizer na AstraZeneca.

Igerageza ryerekanye ko ziriya nkingo zombi zirinda umuntu wanduye virus ya SARS-CoV-​2 itera COVID-19 kuremba 100%, zikarinda uwanduye kugaragaza ibimenyetso kuri 97% na 76% nk’uko zikurikirana.

Buriya bushobozi ariko bugerwaho iyo umuntu yamaze guhabwa inkingo ebyiri ziteganywa.

Ikindi kibazo gikomeye bagarutseho ni ukwihinduranya kwa Virusi ya COVID-19, aho ubwoko bwa Delta bwagaragaye bwa mbere mu Buhinde buheruka kugaragara muri Uganda na Repubulika ya Demokarasi ya Congo mu gihe hari abantu benshi mu Rwanda bajya muri biriya gihugu.

0Shares

Leave a Reply

Your email address will not be published.