Ethiopia: Amerika itangaza ko muri Tigray habaye ‘itsembabwoko’

Antony Blinken, umunyamabanga wa leta y’Amerika, yavuze ko abaturage bo mu karere ka Tigray mu majyaruguru ya Ethiopia bakorewe icyo yise itsembabwoko.

Ubwo yatangaga ubuhamya imbere y’akanama ko mu nteko y’Amerika, yasabye leta ya Ethiopia kureka ibi ndetse ikareka guhonyora uburenganzira bwa muntu muri ako karere.

Bwana Blinken ushinzwe ububanyi n’amahanga bw’Amerika, yavuze ko abasirikare ba Eritrea n’intagondwa z’umutwe wo muri Ethiopia bagomba kuva muri Tigray.

Yagize ati: “Hari, nkuko mubizi, ingabo za Eritrea ziri hariya ndetse hari n’ingabo zo mu karere ko hafi aho ka Amhara, na zo zihari”.

Umunyamabanga wa leta y'Amerika Antony Blinken yasabye ko ihonyorwa ry'uburenganzira bwa muntu rihagarara muri ako karere
Umunyamabanga wa leta y’Amerika Antony Blinken yasabye ko ihonyorwa ry’uburenganzira bwa muntu rihagarara muri ako karere,REUTERS

“Bagomba kuhava kandi [hacyenewe] ingabo zitazahonyora uburenganzira bw’abaturage ba Tigray cyangwa ngo zikore ibikorwa by’itsembabwoko, twabonye mu burengerazuba bwa Tigray, ibyo bigomba guhagarara”.

Bwana Blinken yongeyeho ati: “Tunacyeneye ko abantu babiryozwa bisesuye kandi ducyeneye iperereza ryigenga ku byahabereye”.

A man mourns in the village of Dengolat, North of Mekele, the capital of Tigray

Mu ntangiriro y’uku kwezi, yashishikarije leta ya Ethiopia kwemera iperereza ry’amahanga ku bwicanyi ndengakamere bivugwa ko bwakorewe muri ako karere.

Leta ya Ethiopia yamaganye ibyo inengwa n’Amerika, ivuga ko intambara yo muri Tigray ari ikibazo cy’imbere mu gihugu kireba Ethiopia yo ubwayo.

Ivomo:BBC

The Source Post

0Shares

Leave a Reply