Ebola yongeye kugaragara muri Congo Kinshasa

Minisiteri y’ubuzima muri Repubulika ya Demokarasi ya Congo yatangaje ko hari umuntu urwaye Ebola wongeye kuboneka muri iki gihugu.

Ni umugore w’umuhinzi w’ahitwa Biena hafi y’umujyi wa Butembo, iyi ndwara ikaba yahise imwica nkuko byatangajwe na minisitiri w’ubuzima muri iki gihugu Eteni Longondo kuri televiziyo y’iki gihugu RTNC.

Itangazo ry’ishami rya Loni ryita ku buzima ( OMS/WHO) rivuga ko uwo mugore yaje kwivuza ku kigo cy’ubuzima kiri hafi ye afite ibimenyetso bya Ebola, ivuga kandi ko umugabo we yari mu bantu bakize Ebola.

Ebola yaherukaga kwibasira DR Congo mu kwezi kwa gatandatu umwaka ushize wa 2020, nk’uko OMS ibivuga. Ubu byaba bibaye inshuro ya 12 yibasiye iki gihugu.

OMS ivuga ko inzobere mu byorezo zageze muri ako gace gukurikirana iby’uyu muntu bayisanzemo, ivuga kandi ko abantu 70 bahuye n’uyu mugore bamaze kuboneka.

Ibipimo by’uwo mugore byahise byoherezwa kuri laboratoire yisumbuyeho i Kinshasa ngo bapime ubwoko bw’iyi Ebola yabonetse, niba nta sano bufitanye n’iheruka.

Icyorezo cya 10 cya Ebola muri DR Congo cyamaze hafi imyaka ibiri, cyari icya cyabiri gikomeye ku isi kuko cyarangiye gihitanye abantu 2,299 ku bantu 3,481 bagisanzemo, naho 1,162 barakize.

 

Ibikorwa byo kwita ku banduye Ebola muri Congo byaberaga aha © REUTERS/Baz Ratner

Tariki 16 Ukwakira 2020 nibwo umurwayi wa nyuma yaherukaga kugaragara muri iyi ntara ya Équateur, bigatangazwa ko yakoze. Nyuma OMS itangaza ko nta Ebola ikirangwa muri iki gihugu.

Ebola ni iki? Imaze guhitana abangana gute? 

Iki cyorezo cyavumbuwe mu 1976 na Peter Piot ndetse n’ikipe mpuzamahanga yarrimo umwarimu w’umunye-Congo witwa Muyembe. Iyi virusi umuntu ayanduzwa n’inyamaswa zanduye.

  • Ebola ni a virus ibanza gutera umuntu guhinda umuriro vuba, gucika intege bikomeye, kuribwa ingingo no kubabara mu muhogo
  • Hakurikiraho kuruka, guhitwa no kuvira imbere n’inyuma
  • Abantu bayanduzwa n’amatembabuzi ayo ariyo yose y’umuntu wayanduye
  • Abayirwaye kenshi bicwa n’umwuma, n’ingingo z’imbere mu mubiri zangirika ari nyinshi

Iki cyorezo cyatangajwe bwa kabiri muri Congo tariki ya 1 Kanama 2018 mu burasirazuba bw’iki gihugu, aho cyahitanye abantu 2.287  mu bacyanduye 3.470.

Ni icyorezo kandi cyahitanye abantu basaga ibihumbi 11 hagati y’imyaka 2013-2016 muri Afurika y’i Burengerazuba. Kugeza uyu munsi gifite urukingo.

Uretse Ebola, Congo Kinshasa yugarijwe kandi na Covid-19 imaze guhitana abantu 681 muri 23.599 bayanduye.

Ishusho ya virus itera Ebola
Ishusho ya virus itera Ebola
Ikarita yerekana i Butembo na Goma muri DR Congo, ni hafi ya Uganda n'u Rwanda, Uganda
Hafi y’umujyi wa Butembo niho iyi ndwara yabonetse
Map

Ivomo :Microsoft news na BBC

0Shares

Leave a Reply

Your email address will not be published.