I Burundi bambaye udupfukamunwa ku bwinshi!!!!

Mu minsi yashize mu Burundi ntihagaragaraga abantu bambaye udupfukamunwa ndetse uwari perezida yavuze ko Imana ibaba hafi kugeza n’ubwo nta n’umwe wambaye agapfukamunwa ariko ntibagire icyo baba.

Kutambara aka gapfukamunwa (igikoresho cyo kwirinda COVID-19) byakunze kugaragara muri iki gihugu ahabaga hateraniye abantu benshi, nko mu masengesho n’ibiterane, ibikorwa byo kwiyamamaza, gusezera kuri Pierre Nkurunziza, mu muhango wo kumushyingura no kurahiza perezida mushya nyamara ishami rya Loni rishinzwe ubuzima (OMS) isaba abantu kwitwararika bambara aka gakoresho mu gihe bahuye n’abandi.

Uretse kwambara udupfukamunwa, ejo ku wa mbere, bwa mbere mu Burundi hafashwe ibipimo 640 ari nabyo byinshi bya COVID-19 bifashwe ku munsi umwe kuva iki cyorezo cyahagera tariki 31 z’ukwezi kwa gatatu 2020.

Ni ubukangurambaga bushya bwo gupima abantu benshi bwatangijwe ejo ku wa mbere na minisiteri y’ubuzima mu Burundi bugamije kurwanya iki cyorezo.

Ubutegetsi bwa Perezida Nkurunziza wapfuye mu kwezi gushize bwanenzwe gufata nk’icyoroshye iki cyorezo kimaze kwica abantu barenga 540,000 ku isi.

Ubwo yarahizaga leta nshya tariki 30 z’ukwezi gushize kwa gatandatu, Perezida mushya Evariste Ndayishimiye yagize ati:

“Guhera ejo, njyewe ndiyemeje ko icyorezo cyandura cya corona ari umwanzi rutura w’Abarundi kuko ndabona ko bose imitima iri mu mutwe kubera icyo cyorezo, turiyemeje rero kurwanya uwo mwanzi.

“Ubu nyine dutangije isekeza (ubukangurambaga) ryo kurwanya icyo kiza mu Burundi twise ‘Ndakira, sinandura kandi sinanduza'”.

Ari gutanga amashimwe, mu birori by’umunsi w’ubwigenge, perezida mushya yagaragaje ibitari bimenyerewe ko adashyigikiye kwegerana no kuramukanya kw’abantu bahana intoki mu rwego rwo kwirinda iki cyorezo.

Ibikorwa by’ubu bukangurambaga byatangijwe ejo i Bujumbura, ahagaragaye abantu benshi bambaye udupfukamunwa, ibintu nabyo bitari bimenyerewe mu Burundi.

Pierre Nkurunziza wari Perezida w’u Burundi yanenzwe ko yafashe nk’icyoroshye iki cyorezo ndetse akabigaragaza mu mbwirwaruhame ze zitandukanye.

Ku butegetsi bwe ibikorwa byo kurwanya coronavirus ntibyashyizwemo imbaraga nyinshi, nko mu gupima; kuva iyi ndwara yahagera kugeza tariki 15/06 hafashwe ibipimo birenga gato 1,200.

Kuva hagiyeho Perezida mushya tariki 18 z’ukwezi gushize kwa gatandatu, hamaze gufatwa ibipimo birenga gato 1,900.

Mu kwezi kwa gatanu, umubano wa OMS-Burundi na leta wabayemo ikibazo nyuma y’uko uyihagarariye yirukanywe mu gihugu ku mpamvu zitatangajwe.

Gusa ubu imikoranire iri guhinduka, mu mpera y’icyumweru gishize, OMS ishami ry’i Burundi, yatanze inkunga y’ibikoresho bizifashishwa mu gusuzuma Covid-19 muri ubu bukangurambaga.

Ibikorwa byo gupima abantu benshi byatangiriye i Bujumbura

Minisiteri y’ubuzima mu Burundi ivuga ko ibikorwa byo gupima abantu ku bwinshi bigiye gukomeza mu rwego rwo kumenya neza uko iki cyorezo gihagaze mu Burundi.

Mu kwezi gushize, bamwe mu Barundi babwiye BBC dukesha iyi nkuru ko batizeye ukuri kw’imibare itangwa na leta y’uko iki cyorezo gihagaze mu gihugu.

Mu ntangiriro y’ukwezi gushize kandi, ishyirahamwe ryigenga mu Burundi OLUCOME ryagaragaje impungenge rifite ku mibare itangazwa na leta y’uko iki cyorezo gihagaze.

 

Udupfukamunwa

Minisitiri w’ubuzima Thaddée Ndikumana imbere ya bamwe mu baturage baje ahari gusuzumirwa Covid-19 i Bujumbura, bose bambaye udupfukamunwa

Leta nshya mu Burundi, biciye mu byavuzwe na perezida mushya, irerekana impinduka n’imbaraga nshya mu guhangana n’icyorezo Covid-19.

Kugeza ubu mu Burundi leta imaze gutangaza ko abantu 191 banduye iyi ndwara, umwe yishe na 118 bayikize, hamaze gufatwa ibipimo byose hamwe birenga gato 3,200.

 2,722 total views,  2 views today

0Shares

Leave a Reply