Covid-19: Urwo itangazamakuru ryahuye narwo; abanyamakuru 55 barapfuye

Umusaza upfuye bivugwa ko ari inzu y’ibitabo ihiye, ku munyamakuru we sosiyete iba ibuze ikintu cya mbere mu buzima, Isi imaze kubura 55 guhera muri Werurwe 2020, bose bishwe na Covid-19.

Ni ukuvuga ko mu mezi atatu aba banyamakuru 55 bamaze guhitanwa na covid-19, bitewe no kutikingira bihagije nkuko umuryango ushinzwe ubwisansure bwabo (Press Emblem Campaign-PEC) ubitangaza.

Inkuru y’ikinyamakuru News 24 igaragaza ko bapfuye banduye bitewe no kubura ubwirinzi bukwiye.

Urupfu rw’aba banyamakuru ngo rufatwa nk’igikorwa cy’ubutwari barimo cyo kuburira Isi no gufasha abayituye kubona amakuru atuma birinda iki cyorezo.

PEC ivuga ko abanyamakuru bapfuye bagera kuri 55 mu bihugu 23 ni ubwo ngo bigoye kumenya niba bose baranduriye mu kazi kabo.

Uyu muryango uti “Abanyamakuru baba bari mu byago bikomeye mu gihe hari ibibazo byagaragaye mu bijyanye n’ubuzima, kubera ko baba bagomba gukomeza gutangaza amakuru, bajya mu bitaro, bagirana ibiganiro n’abaganga, abaforomo, abayobozi, inzobere, abashakashatsi mu bya siyansi, abarwaza…”

Mu bapfuye harimo 9 bo muri Equateur/Ecuador bishwe n’iyi virusi. Muri Amerika hapfuye 8 bakurikirwa na 4 bo muri Brazil mu gihe mu Bwongereza ari 3 kimwe no muri Espagne.

Uyu muryango kandi wabwiwe na Loni ko iki cyorezo cyahitanye ku Isi abantu basaga ibihumbi 230, kikandura abasaga miliyoni 3 n’ibihumbi 200 cyifashishijwe n’ibihugu nk’urwitwazo mu gusonyora itangazamakuru. Bimwe mu byakozwe birimo kuriniga, kurifungira interineti, gufunga abanyamakuru, kubatoteza ku buryi bw’umubiri no mu magambo; gukubitwa ndetse no gushyiraho amategeko aribuza bya nyabyo ubwisanzure bwaryo. Ibyo ngo byakozwe mu gihe cyari igihe kidasanzwe cyo gutanga amakuru kuri iki cyorezo.

Ntakirutimana Deus

0Shares

Leave a Reply