Gitifu Jabo Paul yita impuha ibyo avugwaho byo”kudacana uwaka” na bamwe mu bakozi

Uwari umunyamabanga nshingwabikorwa w’intara y’amajyaruguru Jabo Paul yasimbujwe kuri uyu mwanya, aho avuga ko abagira imwe mu mikorere bamuvugaho ari amakuru y’impuha.

Nk’uko bigaragara mu ibaruwa yashyizweho umukono na Minisitiri w’Intebe Dr Edouard Ngirente, iyi ntara yahawe umunyamabanga mushya uwo ni bwana Mushaija Geoffrey wakoraga imirimo nk’iyi mu ntara y’amajyepfo. Ku rundi ruhande Jabo yagizwe gitifu w’intara y’amajyepfo.

Jabo wasimbuwe azwi mu gikorwa cyamwitiriwe abantu bise ‘operation Jabo’, yagize impinduka mu ntara y’i Burengerazuba yari abereye gitifu mbere yo gushyirwa mu y’amajyaruguru. Icyo gihe habayeho inkundura yo kwegura/zwa umusubizo kwa ba meya bahereye i Karongi n’ahandi kubera imicungire mibi yahavuzwe y’umutungo wa leta.

Mu ntara y’amajyaruguru Jabo ntiyagaragaraga cyane mu itangazamakuru. Gusa hari bamwe mu bakozi bamuvugaho kutumvikana na bamwe muri bo bari mu nzego z’ibanze zitandukanye muri iyi ntara.

Umwe ati “Habagaho gukanga abakozi bitabiriye inama, no kubahagurutsa mu ruhame akabatuka, kudahuza n’ibindi, mu by’ukuri ntiyacanaga uwaka na bamwe mu bakozi.”

Undi ati “Ubuyobozi bukora neza iyo butagendeye ku mabwire. Umuyobozi ubwirwa ikintu ariko akagisesengura akishakira ibimenyetso, akabigenderaho afata icyemezo uwo niwe ukenewe muri uru Rwanda rugeze aheza.”

Bavuga kandi ko habagaho ikibazo cyo gusinyira bamwe ibijyanye n’ubutumwa bw’akazi abandi ntibabwemererwe.

Mu kiganiro yagiranye na The Source Post, Jabo yavuze ko ibyo kuba babibwira itangazamakuru ari impuha.

Ati ” Sinjya mvuga amakuru y’impuha, sinkorana n’impuha. Itangazamakuru ntabwo riivuga impuha…..Ababivuga babivugira iwawe ntibabivugire mu kazi. Inkuru zitari porofesiyoneri ntizijya zibona igisubizo.

Jabo ni umuyobozi urambye kuri uyu mwanya kuko abo batangiranye akazi bagiye bava muri izi nshingano.

Ibaruwa yashyizweho umukono na Minisitiri w’Intebe

Intara y’amajyaruguru ni imwe mu zikunze guhora zivugwa n’abayobozi batandukanye kubera impinduka mu iterambere rihavugwa.

ND

0Shares

Leave a Reply

Your email address will not be published.