Antoine Karidinali Kambanda arasaba abatuye Kigali gucisha make nka Mt Yozefu
Yozefu, umutagatifu bamwe bita urugero rw’abakozi, abandi bita umurinzi wa Yezu ngo yaranzwe no gucisha make muri iyi Si, ariko akaba umukozi mwiza, iyi mico ngo niyo ikwiye kuranga abatuye muri Arikidiyoseze ya Kigali.
Kubaho nk’uyu mugabo w’umubaji wahoraga mu isarumara, utarahugaga ashakira imibereho umuryango mutagatifu w’i Nazareti wari ugizwe na we, Yezu na Mariya(Bikira), abatuye iyi arikidiyoseze babisabwe na Antoine Karidinali Kambanda, umushumba wa Arikidiyoseze ya Kigali.
Yabibasabue ubwo yatangizaga umwaka w’umuryango muri Arkidiyosezi, mu rwego rwo kubahiriza umurongo Papa Fransisiko yatanze, we wasabye ko kuri iyi taliki, ku Isi hose hatangizwa uwo mwaka unahurirana n’Umwaka wa Yozefu Mutagatifu umugabo wa Bikira Mariya n’umurinzi wa Kiliziya ku Isi.
Uyu mwaka watangirijwe mu gitambo cy’Ukaristiya yaturiye muri Paruwasi ya Rulindo kuwa Gatanu tariki 19 Werurwe 2021.
Mu nyigisho y’umunsi, Kambanda yagaragaje ko Mutagatifu Yozefu ari umutagatifu ukomeye cyane. Asaba abatuye uyi arikidiyoseze kumwigiraho. Agira ati :
“Yozefu, n’ubwo agaragara inshuro nke mu byanditswe bitagatifu, ni umutagatifu twakwigiraho byinshi, dore ko avuga make ariko agakora cyane, ashyira mu bikorwa ugushaka kw’Imana. Ni umuntu waranzwe no kwitanga kujyana no kwiyoroshya imbere y’Imana n’abo yari abereye umurinzi mu rugo rutagatifu rw’i Nazareti. Ni urugero mu gutanga uburere bwiza no kwitangira umuryango we, mu byishimo.”
Kambanda yatanze umurongo ugomba guherekeza umuryango w’Imana muri Arkidiyosezi ya Kigali mu mwaka w’umuryango: imbaraga nyinshi zigomba gushyirwa mu ikenurabushyo ryawo, imiryangoremezo ivuguruye ikitabwaho cyane. Uburere bugomba guhabwa umwanya, maze abana bagakura bafite icyerekezo gifatika. Asanga iki gihe cya COVID-19, aho Kiliziya yashinze imizi mu ngo ku miryango itarapfushije ubusa uwo mwanya, dukwiye kugikuramo amasomo menshi. Yasabye abakristu kwihugura cyane, bagasoma kandi bagashyira mu bikorwa inyandiko “AMORIS LAETITIA” (Ibyishimo by’Urukundo) ya Papa Fransisiko, yasohotse mu mwaka wa 2015, nyuma ya Sinodi ku muryango.
Ashimangira ko AMORIS LAETITIA yafasha mu bintu bikurikira:
- Ubwigishwa bwo gutegura abigira umubano w’abashakanye
- Guherekeza ingo z’abamaze guhana Isakramentu ry’Ugushyingirwa
- Uburere bw’abana
- Kuganira hagati y’abashakanye no hagati y’ingo
- Guherekeza ingo zifite ibibazo
- Guha imbaraga Komisiyo y’umuryango muri Paruwasi na Diyosezi
- Ubutumwa bukozwe n’ingo ubwazo
- Kwita ku bageze mu zabukuru
- Kwita ku rubyiruko
- Amahuriro y’ingo n’amahugurwa yazo
Yasabye ko abakristu bashyira imbaraga mu kurwanya imico mibi mvamahanga imunga umuryango n’abatuye urugo. Ati:
“Ibyishimo by’urukundo mu muryango”, ni yo nsanganyamatsiko ikwiye kuyobora ikenurabushyo muri uyu mwaka w’umuryango.”
Missa ihumuje, yagiranye ibiganiro n’abagize inama nkuru ya Paruwasi Rulindo ku bijyanye n’insanganyamatsiko y’umuryango ndetse n’ikenurabushyo muri rusange iwabo, nyuma yo kuganira n’abanyeshuri bo mu ishuri rya École Secondaire Gasiza ryisunga Mutagatifu Albert.
Mberimana Fidele uhagarariye abakuriye inama nkuru ya Paruwasi, yashimiye Kambanda amwizeza ko bazagerageza kurangwa n’uki kwiyoroshya kwaranze Yozefu.
Umunyamabanga nshingwabikorwa w’agateganyo w’umurenge wa Bushoki icyicaro cya Paruwasi Rulindo kirimo, Jean de Dieu Tuyishime na we yishimiye ubufatanye bwiza hagati y’ubuyobozi bwite bwa Leta na Kiliziya.
Padri mukuru yashimiye Kambanda, anamushimirira abakristu ba Rulindo mu miryango yabo, kuko bakomeye ku bukristu muri iki gihe gikomeye cya COVID-19, n’ubwo hatabuze bake bacika intege.
Abanyeshuri ba École Secondaire GASIZA ryisunga Mutagatifu Albert.
Ivomo :Arikidiyoseze ya Kigali
