Urukiko rw’ikirenga rwatangaje ko Ruto yatsinze amatora ya perezida wa Kenya

Urukiko rw’ikirenga muri Kenya rwatangaje ko William Ruto ari we watsinze amatora ya perezida w’iki gihugu.

Uwo mwanzuro watanzwe kuwa mbere tariki 5 Nzeri 2022.

Ni nyuma yuko Raila Odinga  – umukandida watsinzwe – avuga ko amatora yabayemo uburiganya hifashishijwe ikoranabuhanga ngo bigeze ku nstinzi mukeba we William Ruto.

Ikirego cye cyateshejwe agaciro n’urukiko rw’ikirenga rugizwe n’abacamanza barindwi bayobowe n’umuyobozi warwo Martha Koome.

Amajwi yari yatangajwe na Komisiyo y’amatora yanemejwe kugeza ubu, Ruto yatsinze n’amajwi 50.5% mu matora yabaye tariki 9 Kanama,  Odinga wabaye Minisitiri w’intebe agira 48.8%.

Urukiko rwategetse ko Ruto w’imyaka 55 y’amavuko azarahira mu cyumweru gitaha.

Iyi ni inshuro ya gatatu Odinga aregeye urukiko yamagana ibyavuye mu mtora.

Mu myaka itanu ishize uru rukiko rwakoze amateka rutesha agaciro ibyavuye mu matora rutegeka ko haba andi, Odinga wari wareze ariko yanze kuyitabira.

Ruto na Odinga bari bavuze ko bazemera umwanzuro w’uru rukiko ku mpaka zo kuri aya matora.

Leave a Reply

Your email address will not be published.