Rayon Sports, Gasogi na Kiyovu zishobora kwivana muri Shampiyona

Ikipe z’umupira w’amaguru Rayon Sports na Kiyovu Sports zishobora kwivana muri shampiyona y’u Rwanda nyuma yo kutumvikana na FERWAFA ku cyemezo yafashe.

Mu rwego rwo kwirinda icyorezo COVID-19, FERWAFA yafashe icyemezo ko abakinnyi bagomba kujya baba hamwe mu mwiherero kandi bagapimwa icyo cyorezo mu masaha 24 , na mbere ya buri mukino.

Ibyo ni bimwe mu byatangajwe kuwa kabiri tariki 4 Mutarama, ubwo  FERWAFA yagiranaga  inama n’abayobozi b’amakipe y’icyiciro cya mbere n’icya kabiri mu bagabo n’abagore. Ni inama yari igamije kurebera hamwe uburyo shampiyona zakomeza harushaho kurwana n’ikwirakwira ry’ubwandu bwa Covid-19.

 

Bimwe mu bisabwa kugira ngo shampiyona isubukurwe, amakipe agomba gucumbikira abakinnyi bakaba hamwe, ndetse mbere yo kujya mu mwiherero bakabanza gupimwa Covid-19 hakoreshejwe PCR kandi amakipe akiyishyurira ikiguzi.

Abakinnyi bagomba kwitabira umukino bagomba kuba bafite ibisubizo biri Negative bitarengeje amasaha 24 (Bisobanuye ko nta Covid-19 bafite). Sitaff y’ikipe yose nayo igomba gupimwa Covid-19 kandi buri kipe ikajya itanga abantu 10 bagomba kujya ku mukino kandi nabo bakerekana ibisubizo byabo.

Umukino wemewe gusubikwa mu gihe 20% by’abakinnyi ikipe yapimishije basanze barwaye Covid-19. Mu gihe ariko ikipe ifite abakinnyi 16 barimo n’umuzamu umukino ushobora kuba mu gihe habayeho ibiganiro.

Ikipe kandi igomba kujya ipimisha abakinnyi nibura buri masaha 48 ikareba niba hatarimo abarwaye. Buri kipe ku mukino yemerewe abasimbura batanu ariko igasimbuza inshuro eshatu. Buri kipe yemerewe abakinnyi 20 kuri buri mukino.

Ibyo kuba hamwe mu mwiherero ntabwo bikozwa ikipe Rayon Sports ndetse na Kiyovu byatangaje ko zitabikora.

Perezida wa Gasogi United, Imfurayiwacu Uzwi nka KNC yatangaje ko iyo kipe iva muri shampiyona niba nta gihindutse ku ngamba zo kwirinda COVID-19 zatangajwe na FERWAFA.

Ku ruhande rwa FERWAFA ivuga ko utazabyubahiriza azasezera muri shampiyona.

 

 

Leave a Reply

Your email address will not be published.