U Buhinde: Umugabo yakatiwe burundu ebyiri azira kwica umugore we amurishije inzoka y’inshira

Umugabo wo mu Buhinde, wahamwe no kwica umugore amurishije inzoka y’inshira (cobra), yahanishijwe igihano kidakunze kubaho cyo gufungwa burundu kabiri.

Sooraj Kumar yatawe muri yombi mu mwaka ushize nyuma yuko umugore we Uthra apfuye yishwe no kurumwa n’inzoka.

Polisi yatangiye gukora iperereza nyuma yuko umuryango we uvuze ko yishwe, uvuga ko Sooraj yari amaze igihe abajujubya kubera inkwano.

Ku wa mbere, urukiko rwasanze ahamwa no kurekurira inzoka y’inshira ku gitanda ubwo Uthra yari asinziriye.

Uwo mugore w’imyaka 25 yasanzwe yapfiriye mu nzu ye mu kwezi kwa gatanu mu mwaka ushize.

Umuryango we wagize amakenga kuko hari hashize ibyumweru Uthra arumwe n’inzoka y’impiri (yo mu bwoko buzwi nka Russell’s viper). Yari arimo koroherwa kuri uko kurumwa n’iyo ya mbere ubwo iyo nshira yamurumaga.

Polisi yavuze ko iperereza ryagaragaje ko Sooraj ari we wari wihishe inyuma y’ayo magerageza yombi. Yanataye muri yombi umugabo wari wamufashije kubona izo nzoka – yaje kuba “umushinja” anafasha polisi mu iperereza.

Nkuko bitangazwa na LiveLaw, urubuga rwandika ku mategeko rwo mu Buhinde, ibirego bya polisi byari ku mapaji 1,000 bisobanura umugambi wacuzwe ukanashyirwa mu bikorwa na Sooraj.

Ubushinjacyaha bwari bwavuze ko ibyabaye ari “imbonekarimwe mu mbonekarimwe”, busaba ko uregwa ahanishwa igihano cy’urupfu.

Umucamanza yemeye ko ibyabaye ari imbonekarimwe, akatira Sooraj gufungwa burundu kabiri, anamutegeka kuriha amande angana n’ama-rupee 500,000 (agera kuri miliyoni 6 mu mafaranga y’u Rwanda).

BBC

0Shares

Leave a Reply

Your email address will not be published.