RIB yafunze Karasira Aimable imukurikiranyeho guhakana no guha ishingiro jenoside

Urwego rw’igihugu rw’ubugenzacyaha -RIB rwafunze umuhanzi Karasira Aimable rumukurikiranyeho icyaha cyo guhakana no guha ishingiro jenoside yakorewe abatutsi muri 1994 n’icyaha cyo gukurura amacakubiri.
Ibyaha uyu wahoze ari ari umwarimu muri kaminuza y’u Rwanda akurikiranweho biteganywa kandi bigahanwa n’ingingo ya 5 n’iya 7 y’itegeko ryerekeranye n’icyaha cy’ingengabitekerezo ya jenoside n’ibyaha bifitanye isano na yo, n’ingingo ya 164 y’itegeko riteganya ibyaha n’ibihano muri rusange.
Ubu afungiye kuri sitasiyo ya RIB ya Kicukiro mu gihe dosiye ye itegurwa kugirango ishyikirizwe Ubushinjacyaha. RIB yibutsa abantu bose ko uwo ari we wese uzitwaza imbuga nkoranyambaga agakora ibyaha azabihanirwa.
Karasira aherutse gusohoka muri videwo yaciye kuri youtube avuga ko yanga Perezida Paul Kagame, ko adategekewe kumukunda, akomoza ku by’amoko mu Rwanda, amashyaka mu Rwanda, kwibuka mu bigo bya leta n’ibindi.

Umwarimu Aimable Uzaramba Karasira uzwi nka Professor Nigga aherutse kwirukanwa muri Kaminuza y’u Rwanda yari amaze imyaka 14 yigishamo, nyuma yo gushinjwa imyitwarire mibi mu kazi.

Ibaruwa yanditswe n’uwari umuyobozi wa Kaminuza y’u Rwanda, Prof Philip Cotton, kuwa Gatanu tariki 14 Kanama 2020, yabanje kwibutsa Karasira amakosa atandukanye amaze iminsi akora ahabanye n’amategeko agenga abakozi ba Leta.

Ibaruwa ikomeza igira iti “Nyuma yo gusanga hari impanmvu zikomeye by’umwihariko isubiramakosa kuko ibihano byo mu rwego rw’akazi uheruka gufatirwa byafashwe tariki 10 Ukuboza 2019, bigahurirana n’andi makosa y’imyitwarire atandukanye, mbabajwe no kukumenyesha ko wirukanywe muri Kaminuza y’u Rwanda guhera uyu munsi.”

Iyi baruwa yanditswe nyuma y’iminsi mike Koleji y’Ubumenyi n’Ikoranabuhanga muri Kaminuza y’u Rwanda ari naho Karasira yigishaga, imusabye ibisobanuro ku myitwarire itandukanye yamuranze guhera muri Werurwe ubwo amashuri yafungwaga hirindwa icyorezo cya Coronavirus.

Muri iyo baruwa ya mbere, Koleji yamusabye gusobanura iby’amagambo amaze iminsi atangaza ku mbuga nkoranyambaga, harimo aho kuwa 3 Nyakanga anyuze ku rubuga rwa Youtube, yavuze ko “u Rwanda rudaha agaciro umunsi w’Ubwigenge”. Tariki 20 Nyakanga 2020, ngo yagize ati “Mu Rwanda hari ubuzima bubi, utifuza gushyiranwa n’umunyarwanda ndetse utifuza kuba umunyarwanda”.

Ayo makosa ari nayo yahereweho yirukanwa kandi, harimo kuba akoresheje umuyoboro we wa Youtube yaragiye atangaza amagambo yateza imyivumbagatanyo muri rubanda kandi atesha agaciro urwego akorera n’inzego za Leta muri rusange, bihabanye n’Iteka rya Perezida rigena imyitwarire y’abakozi ba Leta.

Guhera ubwo Coronavirus yatangiraga muri Werurwe uyu mwaka, ngo abarimu basabwe gushyira amasomo bigisha ku rubuga rutangirwaho amasomo mu buryo bw’ikoranabuhanga ntiyabikora, kugeza ubwo yandikirwa yibutswa n’umuyobozi w’ishami yigishamo.

Mu gihe kandi amabwiriza muri Kaminuza y’u Rwanda asaba abarimu kongera ubumenyi bakagera ku cyiciro cya Phd, ngo Karasira yarabyanze ndetse ngo yahawe amahirwe mu 2008 yo kujya kwiga mu mahanga, yanga kuyabyaza umusaruro.

Kaminuza yamwandikiye imumenyesha ko ibabazwa n’uko “afata umwanya munini wo kuvuga ku mbuga nkoranyambaga aho kuwufata yongera ubumenyi bwe no kwita ku kazi” kandi amabwiriza agenga abakozi ba Leta asaba umukozi wese kutajya mu yindi mirimo yaba ihemberwa cyangwa idahemberwa ituma adakora inshingano ze.

Ibaruwa ya Koleji y’Ubumenyi n’Ikoranabuhanga, Karasira yari yasabwe kuyisubiza mu gihe kitarenze iminsi ibiri. Yarasubije ariko ibisobanuro bye ntibyanyura ubuyobozi, biba ngombwa ko hitabazwa akanama gashinzwe imyitwarire.

 

0Shares

1 thought on “RIB yafunze Karasira Aimable imukurikiranyeho guhakana no guha ishingiro jenoside

Leave a Reply

Your email address will not be published.