Covid-19: U Rwanda n’ibihugu byo mu karere byakiriye inkingo za Covax

Indege itwaye doze 240,000 z’urukingo rwa AstraZeneca muri gahunda ya Covax yageze i Kigali mu gitondo kuri uyu wa gatatu, nk’uko bivugwa na minisiteri y’ubuzima.

Muri iyo gahunda kandi mu ijoro ryacyeye, Kenya yakiriye doze miliyoni 1.02 z’uru rukingo rwa AstraZeneca, na DR Congo yakira doze miliyoni 1.7 z’urwo rukingo.

Uyu munsi nimugoroba u Rwanda rurakira izindi doze 102,960 z’urukingo rwa Pfizer, nk’uko bivugwa na minisiteri y’ubuzima mu itangazo yasohoye.

Iyi minisiteri yatangaje ko izo doze zose zizaterwa abantu 171, 480 bashyizwe mu cyiciro cy’abafite ibyago byinshi, mu gihe gukingira bitangira ku wa gatanu w’iki cyumweru.

Urukingo rwa AstraZaneca
Urukingo rwa AstraZeneca ruri gutangwa rwatubuwe n’ikigo The Serum Institute of India/AFP

Gukingira muri ibi bihugu biteganyijwe ko bihera ku bakozi bo mu nzego z’ubuzima, n’abo mu nzego zihutirwa hamwe n’abafite ibyago byinshi byo kwibasirwa n’iki cyorezo.

Muri gahunda ya Covax, izi ni doze z’inkingo za AstraZeneca ibihugu byo mu karere bizakira, ku rutonde rw’agateganyo rwatangajwe na WHO/OMS mu kwezi gushize:

  • DR Congo: 6,948,000
  • Kenya: 4,176,000
  • Rwanda: 1,098,960 (AstraZeneca na Pfizer)
  • South Sudan: 864,000
  • Uganda: 3,552,000

Mu kwezi gushize, u Rwanda rwakingiye abantu rukoresheje inkingo bivugwa ko ari iza Pfizer, zari “doze nkeya rwabonye mu bufatanye mpuzamahanga”, nk’uko byavuzwe na minisiteri y’ubuzima.

Inkingo za Covax zakirwa i Kigali mu gitondo ku wa gatatu
Inkingo za Covax zakirwa i Kigali mu gitondo ku wa gatatu/RBA
 

Mu Rwanda hamaze gutangazwa abantu barenga 19,000 banduye Covid-19 na 265 imaze kwica.

Mu itangazo, Minisitiri w’ubuzima Dr Daniel Ngamije yavuze ko bafite “intego yo gukingira 30% by’abaturage b’u Rwanda kugera mu mpera ya 2021, na 60% kugera ku mpera ya 2022”.

Covax ni gahunda ishyigikiwe na Loni, UN/ONU yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko.

Iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.

Ivomo:BBC

The Source Post

0Shares

Leave a Reply